АҚШ президенті Дональд Трамп Иранның Вашингтонмен арадағы қақтығысты тоқтатуға бағытталған келіссөздерді тым ұзаққа созып жатқанын айтып, Тегеранның бұл үшін жауап беретінін мәлімдеді.
Трамп «Truth Social» желісінде Иран күштерінің ауыр жағдайда екенін, әскери-теңіз күштері мен әуе күштерінің едәуір бөлігі жойылғанын алға тартып, Тегеранның әрекеттен гөрі сөзге көбірек жүгінетінін жазды. Ол Иранмен келісімнің ұзаққа созылғанын айтып, бұл үшін олардың жауап беретінін ескертті.
Бұл мәлімдемелер Израиль мен Иран арасындағы бірнеше күнге созылған өзара шабуылдардан кейін жарияланды. АҚШ Орталық қолбасшылығы америкалық «Apache» тікұшағының апатына жауап ретінде Ормуз бұғазы маңындағы Иранның әуе қорғанысы жүйелері мен радар нысандарына соққы бергенін хабарлады.
Ал Иран Ислам революциясы сақшылар корпусы аймақтағы АҚШ-тың әуе және теңіз базаларындағы 21 нысанға шабуылдағанын мәлімдеді.
Трамп тағы бір жазбасында АҚШ-тың Иранға қарсы теңіз блокадасын «теңіз соғысы тарихындағы ең нәтижелі блокада» деп бағалады.
Сондай-ақ ол «Fox News» арнасына берген сұхбатында Иран келіссөздерді әдейі созып отыр деп айыптап, Вашингтонның Иранның энергетикалық нысандары мен көпірлеріне жаңа соққылар жасау туралы шешім қабылдауға жақын екенін жеткізді.
