БҰҰ Ливандағы БҰҰ Бітімгерлік күштерінің (UNIFIL) патруліне бағытталған соңғы Израиль шабуылдарын айыптады.
БҰҰ бас хатшысының өкілі Стефан Дюжаррик дүйсенбі күнгі баспасөз мәслихатында «Жексенбі күнгі оқиға кезінде Израильдің ұшқышсыз ұшағы UNIFIL патрулі маңына граната тастап, артынша Израиль танкі Кафр-Киладағы UNIFIL операция аймағындағы бітімгерлерге оқ жаудырғаны туралы хабар түсті. Бұл жағдай бізді қатты алаңдатады», – деді.
Дюжаррик шабуылдар кезінде зардап шеккендер жоқ екенін растап, «Бітімгерлеріміз бен олардың жабдықтарына ешқандай зиян келген жоқ», – деп қосты.
Сондай-ақ ол «Бұл оқиғадан бұрын дәл сол аймақта Израильдің тағы бір ұшқышсыз ұшағы UNIFIL патрулі үстінен ұшқан. UNIFIL бітімгерлері ұшақты бейтараптандыру үшін қорғаныс шараларын қолданды», – деп мәлімдеді.
Бітімгерлердің қауіпсіздігі мен қорғалуына қауіп төндіретін кез келген әрекеттің мүлде қабылданбайтынын атап өткен Дюжаррик мұндай әрекеттердің дереу тоқтатылуы қажет екенін айтты.
Еуропалық Одақ та айыптады
Еуропалық Одақ та Израильдің Ливанның оңтүстігіндегі БҰҰ бітімгер күштеріне бағытталған соңғы шабуылын айыптап, барлық тарапты атысты тоқтату режимін сақтауға және Израильді Ливан аумағынан әскерін әкетуге шақырды.
ЕО мәлімдемесінде 26 қазандағы Израиль шабуылының UNIFIL құрамына бағытталғаны және бұл оқиға соңғы апталардағы ұқсас бірнеше оқиғаның жалғасы екені айтылды.
«БҰҰ қызметкерлері мен нысандарының қауіпсіздігі мен қорғалуын халықаралық құқық және БҰҰ Қауіпсіздік Кеңесінің 1701-қарарына сәйкес қамтамасыз ету қажет», – делінген мәлімдемеде.
ЕО шиеленісті төмендетуге шақырып, барлық тарапты 2024 жылы 26 қарашада қабылданған атысты тоқтату келісімін толық сақтауға үндеді және Израильге Ливан аумағынан толықтай әскерін шығару жөнінде үндеу жасады.
UNIFIL жексенбі күні жасаған мәлімдемесінде Израильдің ұшқышсыз ұшағы мен танкі Ливанның оңтүстігіндегі Кфар-Кила маңындағы патрульге шабуыл жасағанын хабарлады.
Бітімгерлік миссия сондай-ақ сол аймақта Израильдің тағы бір ұшқышсыз ұшағы UNIFIL патрулі үстінен ұшқанын және бітімгерлер оны бейтараптандыру мақсатында қорғаныс шараларын қолданғанын растады.
UNIFIL 1978 жылдан бері Ливанның оңтүстігінде жұмыс істеп келеді және 2006 жылы Израиль мен Хезболла арасындағы соғыстан кейін БҰҰ Қауіпсіздік Кеңесінің 1701-қарары негізінде оның мандаты айтарлықтай кеңейтілген болатын.
