ДДСҰ Бас директоры Тедрос Адханом Гебрейесус дүйсенбі күні “X” платформасында жариялаған мәлімдемесінде: «Аль-Ахли ауруханасында хирургиялық және шұғыл көмек қызметтерін күшейту үшін 24 сағат ішінде шұғыл медициналық топ жібердік. Адамдардың қайтып оралуымен бірге Газа қаласында қосымша топтарды орналастыру жоспарлануда. Сонымен қатар біз Газаға инсулин, зертханалық материалдар және негізгі дәрі-дәрмектерді қамтитын сегіз жүк көлігін жеткіздік», — деді.

Гебрейесус сондай-ақ ДДСҰ-ның Еуропа Газа ауруханасына онкология аурулары үшін дәрі мен өзге де өмірлік маңызы бар материалдар, сондай-ақ инкубатор, өкпені жасанды желдету құрылғылары және пациент мониторлары секілді жансақтау құрал-жабдықтарын жеткізгенін мәлімдеді. Бұл жабдықтар кейін аймақтағы басқа ауруханаларға таратылмақ.

«Денсаулық сақтау мекемелеріне қолжетімділікті арттыру және біздің операциялық миссияларымызды кеңейту — Газа тұрғындарына шұғыл медициналық көмек көрсетудің өмірлік маңызы бар алғашқы қадамдары», -деді ол.

Гебрейесус бұл аптаны «дұрыс бағыттағы маңызды қадам» деп атап, ұйымның өмірді сақтап қалу және негізгі медициналық қызметтерді қайта қалпына келтіру ісінде күш-жігерін арттыруға дайын екенін айтты.

«Газа денсаулық сақтау жүйесі тек қалпына келтіріліп қана қоймай, сонымен бірге халықтың қажеттіліктеріне бейімделген, әділ әрі төзімді жүйе ретінде қайта құрылуы керек. Ең жақсы дәрі — бейбітшілік», - деді ол.

Газаға қатысты атысты тоқтату келісімінің алғашқы кезеңі АҚШ президенті Дональд Трамптың екі жылға созылған Израильдің Газаға қарсы соғысын тоқтату жоспары аясында жұма күні күшіне енді.

Дүйсенбі күні таңертең ХАМАС Газа аймағында ұстаған 20 израильдік тұтқынды босатқаннан кейін Израиль түрмелеріндегі палестиналықтарды босату процесі басталды.