Солтүстік Африка елінде наразылықтар жалғасып жатқанда, мемлекеттік БАҚ сәрсенбі күні Мароккода бір топ адамның полиция бөлімшесіне шабуыл жасамақ болғанын, кейін полицейлер оларға оқ атып, екі адамның қаза тапқанын хабарлады.

«Discord» веб-платформасы арқылы ұйымдасқан, кімдер екендігі белгісіз жастар бастаған наразылық бірнеше күннен бері Марокконы дүр сілкіндірді.

Марокко Ішкі істер министрлігі сәрсенбі күнгі мәлімдемесінде денсаулық сақтау және білім беру саласын реформалауды талап еткен шеру кезінде 400-ден астам адамның қамауға алынғанын және шамамен 300 адамның жараланғанын хабарлады.

Үкіметке қарасты «MAP» хабар агенттігі жергілікті билікке сілтеме жасап, Агадир қаласының маңындағы Лклияда бір топ адамның полиция бөлімшесін басып алуға тырысқанын жеткізді.

Билік өкілдерінің айтуынша, шабуылдың мақсаты оқ-дәрілерді, жабдықтар мен қызмет қаруларын қолға түсіру болған және қызметкерлер қорғаныс үшін қару қолдануға мәжбүр болған.

«MAP» агенттігінің ақпаратына сәйкес, полиция алғашқы шабуылды тойтарғанымен топ кескіш құралдармен қайта шабуыл жасаған.
Ресми деректерде: «Бұл шабуыл барысында екі адам қаза тауып, қалғаны жараланды» делінген. Оқиғаға байланысты сотқа дейінгі тергеу басталды.

Сәрсенбі күні Касабланка, Танжер және Тетуан секілді қалаларда жүздеген шеруші жиналды. Сенбі күні басталған шерулер алғаш рет ресми рұқсатпен өткен болатын.

Шерушілер жемқорлықты тоқтатуды, еркіндік, абырой және әлеуметтік әділеттілікті қалайтынын, кейбірі премьер-министр Азиз Ахханнуштың отставкаға кетуін талап етті. Қатысушылардың бір бөлігі бұл көзқарасты қолдамады. Рабатқа жақын Сале қаласындағы «AFP» тілшісінің айтуынша, жүздерін жасырған кейбір адамдар полиция көліктері мен  банк бөлімшесін өртеген.