Түркия президенті Режеп Тайып Ердоған мен Ұлыбритания премьер-министрі Кир Стармер «Eurofighter Typhoon» жойғыш ұшақтарына қатысты екіжақты келісімге қол қойды. Ердоған дүйсенбі күні Анкарада Президент кешенінде Стармермен бірге келісімге қол қойғаннан кейін «Біз мұны екі жақын одақтас арасындағы стратегиялық қатынастардың жаңа нышаны деп санаймыз», – деді.
Президент Ердоған «Eurofighter» келісімі Ұлыбританиямен ортақ қорғаныс жобаларының жаңа кезеңіне жол ашатынына сенім білдірді. Ол сондай-ақ Түркия мен Ұлыбритания арасындағы сауда айналымын 40 миллиард долларға дейін арттыруды және экономикалық байланыстарды нығайтуды мақсат етіп отырғанын атап өтті.
Ердоған сөзінде: «Біз Ұлыбританиямен сауда көлемімізді алдымен 30 миллиард долларға, кейін 40 миллиард долларға дейін жеткізуге ниеттіміз. Экономикалық байланыстарымызды күшейткіміз келеді. «Eurofighter» консорциумы аясында атқарылған жұмыстары үшін премьер-министр Стармер мен делегациясына ризашылығымды білдіремін. Сондай-ақ консорциумға мүше өзге де одақтас елдердің көшбасшыларына сындарлы ұстанымдары үшін алғыс айтамын», – деп қосты.
Тарихи келісім
Ұлыбритания премьер-министрі Кир Стармер келісімнің шамамен 11 миллиард долларды құрайтынын айтты.
«Бұл шынымен де маңызды келісім, себебі ол 10,7 миллиард долларлық тапсырысты қамтиды. Бұл алдағы он жылға созылатын өндіріс демек», – деді Стармер. Ол Түркия мен Ұлыбритания арасындағы «Eurofighter Typhoon» жойғыш ұшақтарына қатысты келісімді «НАТО қауіпсіздігі үшін үлкен жетістік» деп атады.
Ортақ баспасөз мәслихатында сөз сөйлеген Стармер: «Бұл келісім НАТО көлемінде қауіпсіздікті арттырып, екіжақты қорғаныс ынтымақтастығын тереңдетеді. Сонымен қатар Түркияда да, Ұлыбританияда да экономикалық өсімді қолдап, 20 мың адамды жұмыспен қамтамасыз етеді. Бұл заманауи соғыс ұшақтарын өндіруді қамтамасыз ететін стратегиялық серпіліс», – деді.
Стармер бұл сәтті «екі ел арасындағы ынтымақтастықтың тереңдігі мен кеңдігін бейнелейтін тарихи кезең» деп сипаттады.
Ұлыбритания Қорғаныс министрлігі келісімнің 20 «Eurofighter Typhoon» ұшағына арналғанын растады.
Премьер-министрмен бірге Анкараға келген Қорғаныс министрі Джон Хили болса: «Түркия - маңызды НАТО одақтасы әрі Қаратеңіздің күзетшісі. Оларды жаңа буын «Typhoon» жойғыш ұшақтарымен жабдықтау арқылы бұл келісім НАТО-ның тежеу қабілетін күшейтіп, барлығымыздың қауіпсіздігімізді арттырады», – деп мәлімдеді.
Ұлыбритания үкіметі бұл келісімді «ең ірі жойғыш ұшақ экспорты келісімі» деп атады. Келісімнің жүзеге асуы - Эдинбург, Уортона, Сэмлсбери және Бристольдегі өндіріс желілерінде 20 мың британдықты жұмыспен қамтамасыз ететінін хабарланды.
Жалғыз ұшақ емес
Өткен апта «Airbus Defence and Space» компаниясының бас директоры Майкл Шёллхорн «Eurofighter» келісімі туралы мәлімдеме жасап, бұл жоба өндіріс көлемін ұлғайта отырып және жаңа технологиялармен жетілдірілген үлгілерді әзірлеу арқылы Түркиямен ұзақ мерзімді әріптестік орнатуға жол ашатынын айтты.
НАТО-ның екінші ең қуатты әскери күші саналатын Түркия, Ұлыбритания, Германия, Италия және Испания бірлесіп жасаған көпмақсатты соғыс ұшағы «Eurofighter Typhoon» арқылы отандық жойғыш ұшақтар өндіріске шыққанға дейін әуе күштерінің ұшақ түрлерін әртараптандыруды көздеп отыр.
Қазіргі уақытта «Eurofighter Typhoon» жойғыштары Еуропада Ұлыбритания, Германия, Италия, Испания және Австрияның, ал Таяу Шығыста Сауд Арабиясы, Оман, Кувейт және Катардың Әуе күштерінде пайдаланылып келеді.
