Илон Маск дүйсенбі күні “X” платформасына ірі кибершабуыл жасалғанын мәлімдеді. Бұл жағдай саяси тұрғыдан даулы миллиардердің тікелей нысанаға алынып алынбағаны немесе бұрынғы Twitter-дің қызметкерлерін қысқартуы әлеуметтік желіге кері әсерін тигізіп тигізбегені туралы сұрақ тудырды.

Дүйсенбі күні таңертеңнен бастап “X” платформасында ақаулар туралы хабарламалар тарай бастады. “Downdetector” бақылау сайтының мәліметінше, Азия, Еуропа және Солтүстік Америкадағы қолданушылар платформаны аша алмаған.

“X”-ке қарсы ірі кибершабуыл болды (және әлі де жалғасуда)», – деп жазды Маск платформасында. Күн өткен сайын платформа кейде жұмыс істеп, кейде істемей тұрған.

“SpaceX” және “Tesla” басшысы өткен жылы Дональд Трамппен сұхбатты трансляциялау кезінде сайттың істен шығуын да кибершабуылмен байланыстырған болатын, бірақ ол кезде де ешқандай дәлел келтірмеген.

Маск “DogeDesigner” атты аккаунттың жазбасын жариялап, соңғы кибершабуылды өзіне қарсы бағытталған дұшпандық әрекеттердің жалғасы ретінде сипаттады. Бұл жағдай оның Үкімет тиімділігі департаменті (DOGE) басшылығына қарсы наразылықтар мен “Tesla” нысандарына жасалған вандализм әрекеттерімен байланысты болуы мүмкін екенін меңзеді.

“Fox Business” арнасына берген сұхбатында Маск шабуылда қолданылған компьютерлердің цифрлық мекенжайлары Украина аймағынан табылғанын және “X” платформасының нақты не болғанын анықтауға тырысып жатқанын айтты.

Киберқауіпсіздік сарапшылары “X” платформасының ішкі жұмыстарына көз жүгіртпейінше жағдайды бағалау қиын екенін айтады, бірақ мәселенің ұзаққа созылуы шабуылдың белгісі екенін көрсетеді.

«Бұл – толық күшпен жасалған киберсоғыс», – деді “Deepwatch” киберқорғаныс платформасының өкілі Чад Крэгл. «Маск назарда тұрғанда және саяси шиеленістер шарықтау шегіне жеткенде, бұл шабуылдар мемлекетаралық агрессияның барлық белгілерін көрсетеді» деді.