Екі үкімет те қайта күшейген шекара қақтығысынан кейін Таиланд мен Камбоджада 500 мыңнан астам адамның қауіпсіз аймақтарға қашқанын хабарлады. Бұл көрсеткіш биылғы жылдың басында болған ұқсас қақтығыстар кезінде эвакуацияланғандардың жалпы санынан асып түсті.
Таиланд Қорғаныс министрлігінің ресми өкілі Сурасант Конгсири баспасөз мәслихатында журналистерге: «Қауіпсіздікке төнген тікелей қатерге байланысты көптеген бейбіт тұрғынды эвакуациялауға тура келді. Жеті уәлаятта 400 мыңнан астам адам қауіпсіз баспаналарға көшірілді. 2025 жылдың шілдесінде болған бейбіт тұрғындарға жасалған шабуылдардың қайталануына жол бермейміз»,- деді.
Камбоджада Қорғаныс министрлігінің баспасөз өкілі Мали Сочеата журналистерге: «Бес уәлаятта 101 229 адам қауіпсіз баспаналарға және туыстарының үйлеріне көшірілді», - деп хабарлады.
Оңтүстік-Шығыс Азиядағы екі көршілес ел отаршылдық кезіндегі 800 шақырымдық (500 миль) шекара сызбасы бойынша дауласып жатыр. Тарихи ғибадатханаларға деген өзара талаптар қарулы қақтығысқа ұласты.
Осы аптадағы қақтығыстар ˗ президент Дональд Трамптың араағайындығымен жасалған тұрақсыз бітімнен кейін болған ең қанды оқиға. Шілде айында бес күнге созылған қақтығыстар ондаған адамның өліміне және шекараның екі жағында шамамен 300 мың адамның баспанасын тастап кетуіне әкелген еді.
