Америка Құрама Штаттарының Орталық қолбасшылығы (CENTCOM) АҚШ пен Израильдің Иранға жасаған бірлескен шабуылдары кезінде қаза тапқан тағы екі сарбаздың мәйіті табылғанын хабарлады.
CENTCOM дүйсенбі күні “X” желісінде жариялаған мәлімдемесінде «2 наурыз күні сағат 16:00 -дағы дерек бойынша, АҚШ-тың алты сарбазы қақтығыс кезінде қаза тапты. АҚШ күштері Иранның аймақтағы алғашқы соққылары кезінде нысанаға алынған нысаннан бұған дейін хабар-ошарсыз кеткен екі сарбаздың мәйітін тапты», — деп мәлімдеді.
Мәлімдемеде «ауқымды жауынгерлік операциялардың» жалғасып жатқаны және сарбаздардың кім екендігі туыстарына естіртілгеннен кейін 24 сағат өткен соң ғана ашық жарияланатыны айтылды.
CENTCOM дүйсенбі күні Иранның алғашқы шабуылдарында ауыр жараланған бір сарбаздан кейін АҚШ-тың тағы 4 әскериінің көз жұмғанын хабарлаған болатын. Америкалық “CBS News” телеарнасы АҚШ-тың ресми өкілі мен осы мәселеден хабары бар дереккөзге сілтеме жасай отырып, алты сарбаздың да өткен демалыс күндері Иран жасаған қарымта соққы нәтижесінде Кувейтте қаза тапқанын хабарлады.
Бұған дейінгі мәліметтер сенбі күні АҚШ пен Израильдің Иранға бірлескен шабуылы басталғаннан бері АҚШ-тың 18 сарбазының жараланғанын білдірген еді.
