Ауғанстан мен Пәкістан 6 қарашада Стамбулда бейбіт келіссөздерді қайта бастау және сол уақытқа дейін атысты тоқтату режимін сақтау туралы келісімге келді.
Түркия Сыртқы істер министрлігінің мәлімдемесінде «Тараптар атысты тоқтату режимінің жалғасуы жөнінде өзара келісімге келді. Атысты тоқтатудың орындалуына қатысты қосымша қағидалар 6 қарашада Стамбулда өтетін жоғары деңгейдегі кездесу барысында талқыланып, бекітілетін болады», - деп атап өтілді.
Мәлімдемеде тараптардың бейбітшілікті қамтамасыз ететін және келісімді бұзған тарапқа шара қолдануды көздейтін бақылау және тексеру жүйесін құру жөнінде уағдаласқаны айтылған. «Түркия мен Катар араағайын елдер ретінде екі тараптың белсенді қатысуын жоғары бағалайды және тұрақты бейбітшілік орнату мақсатында екі жақпен де ынтымақтастықты жалғастыруға дайын», - делінген хабарламада.
Ауған және пәкістандық ресми тұлғалар арасындағы келіссөздер Анкара мен Доханың бастамасымен бірнеше күнге созылған араағайындық нәтижесінде Стамбулда аяқталды. Ауған өтпелі үкіметінің өкілі Забихулла Муджахид екі тараптың келіссөздерді жалғастыру жөнінде ортақ шешімге келгенін айтты.
Доха бұған дейін Пәкістан мен Ауғанстан шекарасындағы қақтығыстардан кейін 19 қазанда Катар мен Түркияның араағайындығымен Исламабад пен Кабул арасында келіссөз ұйымдастырған болатын. Сол кезде тараптар атысты тоқтату келісіміне қол жеткізді.
Тараптар өткен апта Стамбулда қайта кездесіп, келіссөздерін жалғастырды. Тұрақты бейбітшілік орнату жолындағы күш-жігер жалғасуда.
Басты шиеленіс көзі – «Техрик-и-Талибан Пәкістан»
Пәкістан Қорғаныс министрі Хаваджа Мұхаммад Асиф «Geo News» телеарнасына берген сұхбатында Катар мен Түркияның өтініші бойынша Пәкістанның бейбітшілікке тағы бір мүмкіндік беруге шешім қабылдағанын мәлімдеді. Сондай-ақ түнде елге оралуы тиіс болған Пәкістан делегациясының Стамбулда қалуы сұралғанын атап өтті.
Пәкістан Кеңес Одағы Ауғанстанды басып алған кезде шамамен төрт миллион ауған босқынын қабылдаған болатын. Алайда «Техрик-и-Талибан Пәкістан» сияқты террористік ұйымдардың ел ішінде жасаған зорлық-зомбылық әрекеттері Пәкістан мен Ауған Талибанының қарым-қатынасын едәуір қиындатты.
АҚШ жетекшілігіндегі күштер 2021 жылы Ауғанстаннан шыққаннан кейін Ауған Талибаны Кабулда билікке қайта келген еді. Пәкістандық әскери дереккөздерге сәйкес, биылдың өзінде 500-ден астам адам қаза тапқан. Олардың 311-ден астамы әскер. Шабуылдардың басым көпшілігі «Техрик-и-Талибан Пәкістан» тарапынан жасалған.
Пәкістан Ауғанстанды «Техрик-и-Талибан Пәкістан» террорлық ұйымын өз аумағында паналатып отыр деп айыптауда, алайда Кабул бұл айыптауларды жоққа шығаруда.
