Иран Сыртқы істер министрлігінің өкілі Исмаил Бекаи дүйсенбі күні жасаған мәлімдемесінде Тегеран АҚШ-тың «қабылдануы мүмкін емес» болған ұсынысына жауап ретінде жақын уақытта Оман арқылы АҚШ-қа ядролық келісімге қатысты қарсы ұсыныс жасайтынын айтты.

Ирандық дипломаттың айтуынша, АҚШ-тың ұсынысы Иран аумағында уран байыту, Иранның жоғары байытылған уран қорын толықтай шетке шығару және АҚШ санкцияларын жоюға қатысты нақты ілгерілеу ұсына алмады.

«АҚШ-тың ұсынысын қабылдамаймыз. Бұл — бұған дейінгі келіссөздердің нәтижесі емес. Біз өз ұсынысымызды бітіріп, оны Оман арқылы қарсы тарапқа жолдаймыз. Бұл ұсыныс ақылға қонымды, қисынды және теңгерімді», – деді ол.

Бекаи Иран мен АҚШ арасындағы ядролық келіссөздердің алтыншы кезеңінің нақты күні туралы әзірге ешқандай мәлімет жоқ екенін атап өтті.

Өткен аптада Иран жетекшісі Аятолла Әли Хаменеи АҚШ-тың ұсынысын ел мүддесіне қайшы деп бағалап, қабылдамады және уран байытуды жалғастыра беретінін хабарлаған болатын.

АҚШ президенті Дональд Трамп 2018 жылы алғашқы президенттік мерзімінде Иран мен алты держава арасында 2015 жылы жасалған ядролық келісімді бұзып, Иран экономикасын тығырыққа тіреген санкцияларды қайта енгізген болатын.

Бұған жауап ретінде Иран уран байытуды келісімде белгіленген шектен әлдеқайда асыра жүргізе бастады.