«CNN Arabic» арнасының хабарлауынша АҚШ президенті Дональд Трамп алдағы айда Таяу Шығыстағы сапар бағдарламасына Түркияны қосуды жоспарлап отыр.

Бейсенбі күні «CNN» арнасына сұқбат берген Ақ Үйдің жоғары лауазымды өкілі мен жоспармен таныс екі сенімді дереккөздің айтуынша Трамптың ықтимал сапары Сауд Арабиясына, Катар мен Біріккен Араб Әмірліктеріне сапарынан кейін болады. Дереккөздер әзірге нақты шешім қабылданбағанын және егжей-тегжейлер нақтыланып жатқанын айтты.

Түркиямен жақсы қарым-қатынас

Ақ Үйдің жоғары лауазымды шенеунігі «CNN» арнасында Трамптың Түркия президенті Режеп Тайып Ердоғанмен соңғы телефон қоңырауында ықтимал сапарды талқылағанын атап өтті. Ақпарат көздерінің хабарлауынша АҚШ президенті сапар барысында Израильге баруды жоспарламаған. Ақ Үй «Анадолы» агенттігінің мәселеге қатысты сауалына әлі жауап берген жоқ. Трамп бұған дейін де Ердоғанмен қарым-қатынасы туралы оң пікір білдірді. Трамп осы аптаның басында Ақ Үйде Израиль премьер-министрі Беньямин Нетаньяхумен бірге журналистерге «Мен Түркиямен және оның президентімен өте жақсы қарым-қатынастамын», -  деген болатын.

Трамп «Түркия Сириядағы Башар Асад билігін күйретті» деген өз сөзіне сілтеме жасап, Ердоғанды ​​«Ешкім жасай алмайтын нәрсені жасаған қатал және өте ақылды адам» деп сипаттады.

Егер бұл сапар жүзеге асса, бұл Трамптың президент ретінде Түркияға жасаған алғашқы сапары болмақ. Түркияға одан бұрын Джордж Буш 2004 жылы, Барак Обама 2009 және 2015 жылдары келген болатын.