Украинадағы төтенше жағдайлар қызметінің мәліметінше бейсенбі күні таңертең Киевке жасалған жаппай зымыран шабуылы салдарынан кемінде тоғыз адам қаза тауып, 60-тан астам адам жарақат алды. Бұл үш жылдық соғыс барысында ел астанасына жасалған ең ауыр шабуылдардың бірі болды.

Украина билігі зымыран шабуылы туралы ескерту жариялады, ал «AFP» журналистері Киевте бірнеше жарылыс дауысын естіді. Украина төтенше жағдайлар қызметі «Telegram» аккаунтында «Ресей Киевке үлкен шабуыл жасады», – деп жазды. «Алдын ала мәліметтер бойынша, тоғыз адам қаза тауып, 63 адам жарақат алды», – делінген хабарламада. Сонымен қатар 42 адам ауруханаға жеткізілген. Олардың алтауы балалар.

Киевтің бес ауданына зақым келтірілген, оның ішінде гараждар мен әкімшілік ғимараттарында өрт шығып, кейін сөндірілген. Төтенше жағдайлар қызметі шабуылдың тұрғын үйлерге де зиян келтіргенін айтты. «Қираған ғимарат үйінділерінен адамдарды іздеу жұмыстары жалғасуда», – делінген хабарламада.

«AFP» тілшісі әуе шабуылы туралы ескертуден кейін көпқабатты үйдің жертөлесіндегі бомбадан қорғану орындарына оннан астам тұрғынның жиналғанын айтты.

Киевке соңғы рет сәуір айының басында зымыран шабуылы жасалып, кемінде үш адам жарақат алған болатын. 2022 жылдың ақпанында Ресей шабуылдары басталғаннан бері қалаға оқтын-оқтын шабуылдар жасалып келеді.

Украинаның шығысында орналасқан Харьков қаласын бейсенбі күні таңертең жеті зымыран шабуылдағанын қала мэрі Игорь Терехов мәлімдеді. Кейінірек ол қаланың бір түнде екінші рет зымырандармен шабуылға ұшырағанын айтты. «Соңғы соққылардың бірі халық көп қоныстанған ауданды зақымдады... Екі адам жарақат алды. Соққы жасалған орындарды тексеру жұмыстары жалғасуда. Қала тұрғындарын сақ болуға шақырамыз», – деді Терехов.