Сыртқы істер министрі Хакан Фидан Сирияның Сыртқы істер министрі Шайбанимен кездесіп, бірлескен баспасөз мәслихатын өткізді.
Фидан мәлімдемесінде былай деді: «Жүргізіп жатқан жұмыстарымыз Сириядағы тұрақтылықтың біртіндеп нығайып, елдер арасындағы ынтымақтастықтың тереңдеп келе жатқанын көрсетеді. Аллаға шүкір, бұл жағдай өңіріміз бен елдеріміздің болашағына үміт ұялатады».
«Біздің болашағымыз ортақ»
Фидан: «Сириядағы оң өзгерістер – өңір елдерінің ортақ жауапкершілігі мен бірлескен күш-жігерінің нәтижесі. Бұған дейін де атап өткеніміздей, Түркия мен Сирияның әл-ауқаты мен тұрақтылығын бір-бірінен бөлек қарау мүмкін емес. Бізді 900 шақырымнан астам шекара ғана емес, ортақ тарих, ортақ мәдениет және ортақ болашақ байланыстырады», – деді.
«Сириямен қарым-қатынасымызды арттырудамыз»
Министр Фидан: «Сириямен экономикалық байланыстарымызды жаңа талаптарқа сай дамытып келеміз. Екіжақты сауда көлемін арттыру мақсатында кедендік рәсімдерді жеңілдету, шекара өткелдерінің мүмкіндігін кеңейту, банк арналарын іске қосу және көлік инфрақұрылымдарын өзара үйлестіру – негізгі басымдықтарымыздың бірі. Мемлекеттік мекемелеріміз бен жеке сектор өкілдері Сирияны қайта қалпына келтіруге, энергетикалық инфрақұрылымды дамытуға және көлік жүйесін жаңғыртуға үлес қосу үшін жұмыс істеп жатыр. Бұл бағытта өңірлік жобалар да маңызды рөл атқарады деп есептейміз. Мәселен Түркия, Сирия, Иордания және Сауд Арабиясы арасында қолға алынған автомобиль және теміржол қатынасын дамыту бастамасын айтуға болады. Бұл – аса маңызды стратегиялық жоба. Оны барынша қысқа мерзімде іске асыру үшін жұмысты бастап кеттік және басшыларымыз қабылдаған шешімге сәйкес жалғастырамыз», – деді.
