Украинаның солтүстік-шығысындағы Харьков облысының губернаторы Олег Синегубов Ресей шабуылдарынан төрт адамның қаза тауып, он адамның жараланғанын хабарлады.
Олег Синегубов сейсенбі күні «Telegram» желісінде: «Ресей қалаға соққы жасады», – деп мәлімдеп, қаза тапқандардың арасында 22 жастағы әйелдің де бар екенін айтты.
Оның айтуынша, шабуылдардан кейін өрт шығып, кемінде 18 көлік зақымданған. Көпқабатты тұрғын үйлердің терезелері сынып, ғимараттардың қасбеттеріне зиян келген. Ал Харьков қаласының әкімі Игорь Терехов 10 адамның жараланғанын мәлімдеді.
Соңғы айларда Ресейдің Украинаға шабуылдары күшейе түсті. Бұған жауап ретінде Украина Ресей аумағындағы нысандарға дрондармен соққы беріп келеді. Терехов украиналық дрондардың негізгі нысаналары әскери және энергетикалық инфрақұрылым екенін жеткізді.
Бейбітшілікке бағытталған күш-жігер
Шабуылдар Украина президенті төрт жылдан бері жалғасып келе жатқан соғыс мәселесін талқылау үшін Кир Стармер, Эмманюэль Макрон және Фридрих Мерц секілді Еуропа елдерінің көшбасшыларымен Лондонда кездесіп, Киевке оралған кезде болды.
Вашингтонның назары Иранда болғандықтан Украина мен Ресей арасындағы бейбітшілікке бағытталған күш-жігер біршама баяулады.
Зеленский дүйсенбі күні АҚШ өкілдері Стив Уиткофф және Джаред Кушнермен нәтижелі кездесу өткізгенін айтып, алдағы апталарда Украинадағы соғысты реттеу бағытында жұмыс істеуге дайын екенін мәлімдеген болатын.
Біріккен Ұлттар Ұйымының есебіне сәйкес, 2022 жылдан бері Украинада кемінде 15 850 бейбіт тұрғын қаза тапқан.
Сондай-ақ Ресей бақылауындағы аумақтарда 2 800-ден астам бейбіт тұрғын қаза тауып, Украина мен Ресей басып алған өңірлерде 44 800-ден астам адам жараланған.
