Жапония Израильдің Палестинада екі мемлекет шешіміне апаратын жолды бөгейтін әрекет жасауы жағдайында «жаңа шаралар қолдануды және жауап беруді қарастыратынын» ескертті.
Нью-Йоркте өткен Палестинаға қатысты БҰҰ конференциясында сөйлеген Сыртқы істер министрі Такеши Ивая: «Жапония Палестина халқының өз тәуелсіз мемлекетін құруға деген ұмтылысын толық қолдайды», – деді.
Ол сондай-ақ: «Егер Израиль екі мемлекет шешімінің жүзеге асуына апаратын жолды бөгейтін әрекеттерін жалғастыра берсе, Жапония жаңа шаралар қабылдауға және жауап беруге мәжбүр болады», – деп қосты.
Токионың ұзақ уақыттан бері екі мемлекет шешімін қолдап келе жатқанын атап өткен Ивая: «Менің елім үшін Палестина мемлекетін мойындау мәселесі – мойындап, мойындамайтынымыз емес, қашан мойындайтынымыз», – деді.
Соңғы апталарда Аустралия, Канада, Ұлыбритания, Франция, Бельгия және басқа да көптеген ел Палестинаны ресми түрде мойындағанына қарамастан Жапония әзірге Палестинаны мойындау туралы шақыруларға қарсы шығып отыр.
Сындарлы кезең
Ивая: «Газадағы гуманитарлық дағдарыстың күрт ушығуы, Батыс Шериядағы заңсыз қоныстану қызметінің кеңеюі және аннексияға бағытталған қадамдар мүлдем қабылданбайды», – деді.
Ол сөзін жалғастырып, «Жапония бұл әрекеттерді қатаң айыптайды және Израильді мұндай біржақты барлық әрекеттерін дереу тоқтатуға шақырады», – деді. Жағдайдың «екі мемлекет шешімінің негізін қауіпке тіккен сындарлы әрі алаңдатарлық кезеңге» жеткенін ескертті.
Израиль басып алған Батыс Шерияны қалпына келтіруге Жапонияның жасаған «нақты үлесіне» назар аударған Ивая Токионың «жан-жақты келіссөздерді одан да үлкен байыптылықпен жалғастыратынын» айтып, Палестинаның «Израильмен тұрақты түрде бейбіт өмір сүре алуы» қажеттігіне тоқталды.
Шілде айында Жапония басып алынған Батыс Шерияда палестиналықтарға қарсы зорлық-зомбылыққа қатысы бар төрт израильдік қоныстанушыға алғаш рет санкция салды.
Конференция БҰҰ Бас Ассамблеясының 80-сессиясы ашылардан бір күн бұрын және БҰҰ зерттеушілерінің Израильдің 2023 жылғы қазаннан бері Газада 65 300-ден астам палестиналықты өмірін қиып, геноцид жасағаны жөнінде қорытындысынан бірнеше күннен кейін өтті.
