Ливанның оңтүстігіндегі басып алынған Дейр Серян елді мекенінде 19 сәуірде Израиль сарбазының Иса пайғамбардың мүсінін талқандауының жаңғырығы басылмай жатып, Израиль христиандарға бағытталған жаңа өшпенділік қылмысымен тағы да күн тәртібіне шықты.
“The Times of Israel” газетіне сілтеме жасаған «Анадолы» агенттігінің хабарына қарағанда, 36 жастағы ер адам басып алынған Шығыс Иерусалимде монах әйелге шабуыл жасаған. Иерусалимдегі Француз Інжіл және археология мектебінде қызмет ететін монах әйел шабуыл салдарынан басынан жарақат алды.
Мектеп директоры Оливье Покильон әлеуметтік желідегі парақшасында бұл шабуылды қатаң айыптайтынын мәлімдеп, Израиль билігінен дереу әрекет етуді талап етті. Полиция шабуылдаушының ұсталғанын хабарлады.
Израиль Сыртқы істер министрлігі монах әйелге жасалған шабуылға өте маңызды мәселе ретінде қарайтынын, тергеу басталғанын және күдіктінің қамауда отырғанын жеткізді. Мәлімдемеде: «Біз бұл жиіркенішті шабуылды қатаң айыптаймыз», — делінген. Сондай-ақ шабуылдың бірлесе өмір сүру және дін бостандығы құндылықтарына қайшы екені атап өтіліп, физикалық қиянатқа ұшыраған монах әйел мен Иерусалимдегі Латын патриархатына «ынтымақтастық» хабары жолданды.
Израиль басқыншылығы мен шабуылдары христиан қауымын да нысанаға алуда
Израиль геноцид жүргізіп жатқан Газа секторында, басып алынған Батыс Шерияда, Шығыс Иерусалимде және Ливанның оңтүстігінде тұратын христиан қауымы Израиль үкіметі мен оңшыл радикалды топтардың физикалық шабуылдарына, мүлікті бүлдіру әрекеттеріне, жүйелі түрде түкіру оқиғаларына және қасиетті орындарды өртеу талпыныстарына ұшырап келеді.
Ливанның оңтүстігіндегі Дейр Серян елді мекенінде 19 сәуірде Израиль сарбазының Иса пайғамбарды бейнелейтін мүсінді балғамен талқандап жатқан суреті әлеуметтік желілерде тараған болатын. Израиль армиясы бұл фотоның шын екенін мойындап, тергеу бастағанын хабарлаған еді. Израиль сарбазының діни нышанға жасаған бұл шабуылы христиан әлемінің үлкен наразылығын тудырды.
