Бельгия Сыртқы істер министрі Бельгия мен Түркия арасындағы экономикалық және технологиялық әріптестіктің барған сайын нығайып келе жатқанын атап өтіп, екі елдің көптеген стратегиялық салада бірін-бірі толықтыратын мүмкіндіктерге ие екенін айтты.
Бельгия патшайымы Матильданың төрағалығымен Түркияға ұйымдастырылған сапар аясында дүйсенбі күні өткен Түркия-Бельгия бизнес форумының ашылуында сөз сөйлеген Максим Прево патшайымның қатысуы Брюссельдің Анкараға айрықша мән беретінін көрсететінін айтты.
«Бұл жай ғана байланыс емес. Бұл Бельгияның Түркиямен қарым-қатынасқа қаншалықты мән беретінін көрсетеді», - деді Прево.
Превоның айтуынша, екіжақты қатынастар шамамен екі ғасырлық саяси, экономикалық және дипломатиялық ынтымақтастыққа негізделген. Ол сондай-ақ Бельгиядағы түрік диаспорасының рөліне ерекше тоқталды.
Бельгия Сыртқы істер министрі екіжақты ынтымақтастықты тереңдетуге зор әлеуеті бар бес саланы атады. Олар: жасыл энергетикаға көшу, авиация және қорғаныс өнеркәсібі, порттар мен логистика, биотехнология және цифрлық трансформация.
«Бұл кездейсоқ таңдалған салалар емес», - деген Прево екі елдің де әлемдік деңгейдегі тәжірибе мен инновациялық әлеуетке ие екенін айтты.
Превоның мәліметінше, Бельгияның Түркияға экспорты 2025 жылы 6,5 миллиард еуроға (7,6 миллиард доллар) жеткен. Оның негізгі бөлігін фармацевтикалық өнімдер мен химиялық заттар құрайды. Ал Түркияның Бельгияға экспорты 5,6 миллиард еуроны (6,5 миллиард доллар) құраған. Бұл экспорттың басты тауарлары — автокөліктер мен металдар.
«Бельгия ̶ Түркиядағы сегізінші ірі инвестор», - деген Прево Бельгияда түрік инвесторларының артып келе жатқанын құптап, бұл жобалардың жүздеген жаңа жұмыс орнын ашатынын атап өтті.
«Түркиялық компаниялардың Бельгияға инвестиция сала бастағанын көру ̶ біз үшін үлкен қуаныш», - деді Бельгия Сыртқы істер министрі.
Министр Түркия өнеркәсібін Еуропаның құн тізбектеріне біріктіруде ЕО-Түркия Кеден одағының маңызын атап өтіп, сауда қатынастарының байланыстың тек бір бөлігі ғана екенін айтты.
Фламанд аймағының премьер-министрі Маттиас Дипендале логистика, озық өндіріс, энергетикалық трансформация және технология салаларындағы ынтымақтастықтың артып келе жатқанын айтып, Түркияны «болашақ үшін стратегиялық серіктес» деп атады.
«Бұл делегацияның мақсаты айқын. Біз мұнда зор мақсатпен, сеніммен және мықты іскерлік көзқараспен келдік», - деген Дипендале делегация құрамында ұзақ мерзімді экономикалық әріптестікті нығайтуды көздейтін 500-ден астам бизнес көшбасшы бар екенін айтты.
Түркия-Бельгия бизнес форумында екіжақты сауда қатынастарын дамыту жөніндегі бірлескен декларацияға Түркия Сауда министрі Өмер Болат, Бельгия Сыртқы істер министрі Максим Прево және Бельгия Қорғаныс министрі Тео Франкен қол қойды.
