Ислам ынтымақтастығы ұйымының Экономикалық және сауда ынтымақтастығы жөніндегі тұрақты комитеті аясында Сирияны қолдауға бағытталған арнайы бағдарлама іске қосылды.
Түркия президенті Режеп Тайып Ердоған дүйсенбі күні ислам әлемінің қолдауы - Сирияның саяси бірлігі мен аумақтық тұтастығын сақтау үшін аса маңызды екенін атап өтті.
Ердоған Стамбулда өткен Ислам ынтымақтастығы ұйымы Экономикалық және сауда ынтымақтастығы жөніндегі тұрақты комитеттің министрлер кеңесінің 41-ші отырысында: «Адами және институционалдық әлеуетті нығайтуға үлес қосатын бұл бағдарлама арқылы біз білім беру, маман алмасу, қажеттілікті талдау және техникалық-экономикалық негіздемелер сияқты салаларда Сирияға жоба түрінде қолдау көрсетеміз», - деді.
«Шамамен 14 жыл бойы сириялық бауырларымыз ауыр сынақтардан өтті. Баас режимі мен лаңкестік ұйымдардың шабуылдарынан миллионға жуық сириялық көз жұмды. 3,6 миллион халық Түркияға, ал миллиондаған адам өзге елдерге көшуге мәжбүр болды. Осы қиын кезеңде біз сириялықтарға бауырластық рухпен пана болдық», - деп қосты.
Түркия бауырлас әрі көрші ел ретінде міндетін жоғары дәрежеде атқаруға тырысып жатқанын айтқан Ердоған: «Аллаға шүкір, соңында сириялықтар жеңіске жетті», - деді.
Президент Сирияны 14 жыл бойы қанға булаған зұлымдықтың 8 желтоқсан төңкерісінен кейін тоқтағанын, ал президент Ахмед Шараның басшылығымен қайта қалпына келу кезеңіне қадам басқанын атап өтті.
Ердоған Түркияның көлік, білім, қауіпсіздік, сауда, денсаулық сақтау және әлеуметтік қызмет салаларында Сирия халқына қолдау көрсетуді жалғастырып жатқанын мәлімдеді. Ол: «Елдің саяси бірлігі мен аумақтық тұтастығын сақтау және барлық сириялық бауырларымыздың әл-ауқатын жақсарту жолында ұйымымыздың және ислам әлемінің қолдауы өте маңызды. Сирияның өңірлік экономикалармен ықпалдасуы әрі Сирияға, әрі бүкіл аймаққа пайда әкеледі», - деді.
