Солтүстік Кипр Түрік Республикасы үкіметі Нобель сыйлығының лауреаты, ғалым Азиз Санжардың Солтүстік Кипр Түрік Республикасының азаматтығына қабылданғанын мәлімдеді.
Ресми газетте жарияланған қаулыда ғалымның ғылым, технология және мәдениет салаларының дамуына үлес қосатыны және Солтүстік Кипр Түрік Республикасын халықаралық деңгейде танытуға қолдау көрсететіні атап өтілді.
Азиз Санжар аралға жиі сапарлап, Таяу Шығыс университетінің Синтетикалық биологияны зерттеу және технология орталығының ғылыми кеңесінің мүшесі ретінде Солтүстік Кипр Түрік Республикасының танылуына ұзақ уақыттан бері қолдау білдіріп келе жатқан тұлға.
«Солтүстік Кипр Түрік Республикасы танылуы керек»
2022 жылы Түркия президенті Режеп Тайып Ердоғанның Біріккен Ұлттар Ұйымының Бас Ассамблеясында Солтүстік Кипр Түрік Республикасын халықаралық деңгейде тану үндеуінен кейін Азиз Санжар әлеуметтік желіде «Солтүстік Кипр Түрік Республикасы танылуы керек» деген жазуы бар жейде киген суретін жариялаған болатын.
Санжардың аралға деген адалдығы Солтүстік Кипр Түрік Республикасының президенті Ерсин Татармен тығыз қарым-қатынасы және президенттің Денсаулық сақтау жөніндегі кеңесшісі, профессор Недиме Серакынджымен ынтымақтастығының арқасында одан әрі нығая түсті.
ДНҚ-ны қалпына келтіруде маңызды жаңалық
Санжар ДНҚ-ны қалпына келтіру саласындағы маңызды еңбегімен 2015 жылы Нобель химия сыйлығын жеңіп алды. Жасушалардың зақымданған ДНҚ-ны қалай қалпына келтіретінін картаға түсіру арқылы танымал болған ғалымның бұл жаңалығы тірі ағзалардың генетикалық тұтастығын қалай сақтайтынын түсіну үшін аса маңызды.
Оның зерттеулері күн сәулесі мен токсиндер сияқты күнделікті факторлардан туындайтын ДНҚ зақымдануының қалай түзетілетінін анықтап, қатерлі ісікпен күрес, генетикалық зерттеулер және жекелендірілген медицина салаларында маңызды жетістіктерге жол ашты.
