10 қазан күні күшіне енген бітім келісіміне қарамастан, куәгерлер сәрсенбі күні таңертең Израиль армиясының Газаның бірнеше ауданына шабуыл жасағанын мәлімдеді.
Куәгерлердің айтуынша, Израиль артиллериясы Хан Юнустың оңтүстік-шығысын және Рафа қаласының солтүстігінде орналасқан Мораг дәлізі маңын атқылаған.
Ал Газаның орталық бөлігінде Израильдің әскери техникасы мен бульдозерлері Дейр әл-Балах қаласының солтүстік-шығысынан кіріп, жер қазу жұмыстарын жүргізген.
Сондай-ақ Израиль артиллериясы Газадағы Джебалия босқын лагерінің шығыс бөліктерін атқылаған. Әзірге адам шығыны туралы ақпарат жоқ.
Газа Денсаулық сақтау министрлігінің мәліметінше, бітім жарияланғаннан бері Израиль шабуылдарынан кемінде 393 адам қаза тауып, 1 074 адам жараланған.
2023 жылдың қазанынан бері Израильдің Газаға қарсы жүргізіп келе жатқан геноцид соғысы салдарынан 70700 адам қаза тауып, 171 мыңнан астам адам жараланған. Олардың көпшілігі әйелдер мен балалар. Ал аймақ жермен-жексен болған.
