АҚШ президенті Дональд Трамп Сауд Арабиясын «НАТО-дан тыс маңызды одақтас» ретінде танитынын мәлімдеді. Трамп сейсенбі күні кешкісін Сауд Арабиясының тақ мұрагерімен өткен кешкі аста: «Әскери ынтымақтастығымызды нығайтып, Сауд Арабиясын ресми түрде НАТО-дан тыс маңызды одақтас деп танып отырмыз. Бұл олар үшін өте маңызды мәселе»,-деді.
Бұл мәлімдеме екі ел арасында қол қойылған стратегиялық қорғаныс келісімінен кейін жасалды. Сауд Арабиясының БАҚ-тары құжатты аймақтағы бейбітшілікке, қауіпсіздік пен тұрақтылыққа үлес қосатын және ұзақ мерзімді қорғаныс ынтымақтастығын күшейтетін маңызды қадам деп сипаттады.
Ақ Үйдің хабарлауынша, тақ мұрагері Вашингтонға сапары кезінде АҚШ пен Сауд Арабиясы азаматтық ядролық энергия және қорғаныс салаларында да бірқатар келісімге қол қойды.
АҚШ әкімшілігі екі тараптың азаматтық ядролық энергетикаға қатысты бірлескен декларацияны мақұлдағанын, оның алдағы онжылдықта миллиард долларлық ынтымақтастықтың құқықтық негізін қалайтынын айтты. Ақ Үй бұл ынтымақтастықтың ядролық қарудың таралуын болдырмау талаптарына сәйкес жүзеге асырылатынын атап өтті.
Президент Трамп сондай-ақ «F-35» жойғыш ұшақтарын қамтитын қару-жарақ келісімін мақұлдады.
