Украина президенті Владимир Зеленский АҚШ президенті Дональд Трамппен телефон арқылы сөйлесіп, бейсенбі күні Швейцарияда өтетін екіжақты кездесу барысында талқыланатын мәселелерді қарастырғандарын мәлімдеді.
“X” әлеуметтік желісінде жариялаған мәлімдемесінде Зеленский әңгімеге АҚШ-тың арнайы өкілі Стив Уиткофф пен Трамптың күйеу баласы Джаред Кушнердің де қатысқанын айтты. Ол сондай-ақ Мәскеу, Киев және Вашингтон арасында өтетін келесі үшжақты бейбіт келіссөзге «наурыз айының басында» дайындық мәселесі талқыланғанын атап өтті.
Украина мен АҚШ командаларының қарқынды жұмыс істеп жатқанын айтқан Зеленский олардың атқарып жатқан барлық еңбегі, келіссөздерге белсенді қатысуы және соғысты тоқтату жолындағы күш-жігері үшін алғыс білдірді.
Сонымен қатар ол Украинаның жедел қажеттіліктері тізімі бастамасына ерекше мән берілетінін атап өтті: «Бұл қыс Украина үшін ең ауыр қыстардың бірі болды. Алайда әуе шабуылына қарсы АҚШ-тан сатып алынған қорғаныс жүйелеріне арналған зымырандар бізге бұл қиындықтарды еңсеруге және адам өмірін қорғауға көмектесуде», - деді ол.
Тығырыққа тірелген келіссөз
Бұған дейін Зеленский бейсенбі күні АҚШ елшілері мен Украинаның бас келіссөз жүргізушісі Рустем Умеров арасында кездесу өтетінін хабарлаған болатын. Оның айтуынша, бұл кездесуде Украинаға арналған «Өркендеу пакеті» және бірқатар мәселе талқыланады.
Келіссөздер өткен жылдың соңында жарияланған америкалық жоспарға негізделген. Алайда олар негізінен қақтығыстардың негізгі ошағы саналатын Украинаның шығысындағы Донбасс өнеркәсіп аймағының тағдыры мәселесінде тығырыққа тіреліп отыр.
Ресей Украинаның шығысындағы Донецк облысын толық бақылауға алу үшін қысым жасап, Киев келіссөз үстелінде ымыраға келмеген жағдайда аймақты күшпен басып алу жөнінде қоқан-лоққы жасауда.
Алайда Украина бұл талапты қабылдамай, Ресейдің жаңа шабуылдарын тежейтін қауіпсіздік кепілдіктерінсіз ешқандай келісімге қол қоймайтынын хабарлауда.
