Президент Реджеп Тайып Ердоған Ливанның ұзақ жылдар бойы өңірдегі кейбір күштердің бәсекелестік пен қақтығыс алаңына айналып, ең үлкен зардап шеккен бауырлас ел екеніне назар аударды. Таяу Шығыста тұрақтылық, бейбітшілік пен ынтымақтастық ортасынан ең көп пайда көретін елдердің басында да Ливан тұрғанын айтты.
Президент Ердоған ресми сапармен елорда Анкараға келген Ливан президенті Джозеф Аунмен Президенттік кешеніндегі оңаша кездесуден кейін өткізілген ортақ баспасөз мәслихатында сөз сөйледі.
Израильдің Ливанға қарсы шабуылдары басталған 2026 жылдың 2 наурызынан бері 4 мың 300-ден астам ливандықтың көз жұмғанын, 2 мыңнан астам ливандықтың жараланғанын, 1 миллион адамның үй-жайын, атамекенін тастап кетуге мәжбүр болғанын атап өткен Ердоған былай деді:
«Мұнда тағы да Құрметті Президент мырзаның тұлғасында Ливан халқына көңіл айтып, жараланғандарға тезірек сауығып кетулерін тілеймін. Түркия алғашқы күннен бастап шабуылдарға ең күшті реакция көрсеткен елдердің бірі болды. Израильдің жасаған адамзатқа қарсы қылмыстарын осы үдерісте де күн тәртібінде ұстадық. Бұл шабуыл мен басып алуды тоқтату үшін басталған дипломатиялық бастамаларды жіті қадағалап отырмыз. Израиль шабуылдарынан қатты зардап шеккен Оңтүстік Ливанды қайта қалпына келтіру аясында еліміздің қолдан келгенше қолдау көрсетуге дайын екенін білдіргім келеді».
Ливан президенті Джозеф Аун өз кезегінде Түркия мен Ливан арасында тамыры терең қарым-қатынастардың бар екенін айтты.
Президент Ердоғанға ыстық ықыласпен қарсы алғаны, қонақжайлылығы мен шақыруы үшін алғыс айтқан мәртебелі қонақ президент сапарының маңызды кезеңге тұспа-тұс келгенін атап өтіп, өңірдің қазіргі уақытта болашағы қалыптастырылып жатқан орынға айналғанын жеткізді.
Аун Түркия-Ливан бауырластығының аса маңызды екенін және алдағы кезеңде осы болашақтың құрылуында үлкен рөл атқаратынын алға тартып, «Құрметті Ердоған шынымен де өз көрегендігімен және адал ұстанымымен бұл қарым-қатынастарды қолдап келеді және оларды ынтымақтастықтың жаңа деңгейіне көтеруге бекініп отыр», — деді.
Түркия Республикасының негізін қалаушы Гази Мұстафa Кемал Ататүріктің «Әлемде бейбітшілік, елде бейбітшілік» сөзіне сілтеме жасаған Аун Түркия-Ливан қарым-қатынастары туралы «Екі ел одан әрі ілгерілейді. Ливан-Түркия достығы жасасын», — деді.
