Түркия президенті Режеп Тайып Ердоған: «Өңіріміздің бұдан былай соғыс, терроризм және қақтығыстармен емес, даму, өркендеу, бейбітшілік және тұрақтылықпен танылуы үшін күш-жігер жұмсап жатырмыз», – деді.
Президент Ердоған Президенттік кешенде ресми сапармен Анкараға келген Ирак премьер-министрі Әли әз-Зейдимен жеке және делегациялар арасындағы келіссөздерден кейін түрлі салалардағы келісімдерге қол қою рәсіміне қатысты.
Рәсімнен кейін өткен бірлескен баспасөз мәслихатында сөз сөйлеген Ердоған өңір үшін күрделі кезеңде Ирак премьер-министрі қызметіне кіріскен әз-Зейдиді тағы да құттықтады.
Қарым-қатынастарды бауырластық негізінде жан-жақты талқылағандарын айтқан Ердоған: «Иран, Сирия және Палестинадағы жағдайлармен қатар өңірлік оқиғалар жөнінде пікір алмастық», – деді.
Ердоған Түркиямен іргелес аумақтардағы соғыс жағдайына байланысты келіссөздерде қауіпсіздік, терроризмге қарсы күрес, энергетика және көлік мәселелеріне ерекше мән берілгенін атап өтіп, былай деді: «Көршіміз Ирак өкінішке қарай, соғыс пен тұрақсыздық жағдайынан ең көп зардап шеккен елдердің бірі. Біз ежелден бері Ирактың тыныштығы мен тұрақтылығын еліміздің қауіпсіздігінен бөлек қарастырған емеспіз және бұдан кейін де бөлек қарастырмаймыз. Өңіріміздің ендігі жерде соғыс, терроризм және қақтығыстармен емес, даму, әл-ауқат, бейбітшілік және тұрақтылықпен аталуы үшін күш-жігер жұмсап жатырмыз. Террорсыз Түркия үдерісі мен террорсыз өңір құру жөніндегі көзқарасымыздың жүзеге асуы үшін ирактық бауырларымызбен тығыз диалог жүргізіп келеміз».
Ердоған «British Petroleum» компаниясы операторлық ететін Киркук мұнай өндіру кен орнында «Türkiye Petrolleri» компаниясына серіктестік үлес берілгенін атап өтіп,
«Өткен жылы Иракпен 17 миллиард долларға жуықтаған сауда көлемін бұдан да жоғары деңгейге жеткізуді қалаймыз», – деді.
«Ирактан жеткізілетін 1 миллион баррель мұнай біздің қажеттілігімізді өтейді»
Президент Ердоған Ирак премьер-министрі Әли әз-Зейдидің өз сөзінде: «Біз Түркияға тәулігіне 1 миллион баррель мұнай бере аламыз», – дегенін жеткізді.
«Ол: «Басқа елдерге мұқтаж болмаңыздар. Күніне 1 миллион баррель мұнай бере аламыз», – деді. Құдай қаласа, көршіміз Ирактан тәулігіне 1 миллион баррель мұнайды Түркияға жеткізсек, бұл біздің қажеттілігімізді өтейді», – деді Ердоған.
