Сирияның мемлекеттік «Әл-Ихбария» телеарнасының хабарлауынша, Израильдің басқыншы күштері Кунейтраның оңтүстігіндегі Брика ауылына әскери көліктермен басып кірген.
Сондай-ақ Израиль әскерлерінің осы аймақтағы Расм әл-Акраф ауылында да рейд жүргізгені хабарланды. Сондай-ақ Израиль күштерінің ел астанасы Дамаскінің батысындағы ауылдық аумақта орналасқан Бейт-Джин елді мекені мен әт-Тиләл әл-Хумур аймағының арасына екі артиллериялық снаряд атқаны хабарланды.
Рейд пен артиллериялық атқылаудан кейін адам шығыны немесе материалдық залал туралы ақпарат берілген жоқ. Сирия билігі де бұл мәселеге қатысты әзірге ресми мәлімдеме жасаған жоқ.
Сирияның оңтүстігіндегі Кунейтра мен Дера уәлаяттарында Израиль күштері жиі рейд жүргізіп, тінту, ұстап әкету шараларын өткізіп, әскери бақылау бекеттерін орнатып келеді.
Соңғы рет Израильдің әскери ұшақтары 18 тамызда Идлибтегі Әбу Зухур әскери әуежайының ұшу-қону жолағына 8 рет әуе соққысын жасап, инфрақұрылымға зиян келтірген еді.
Израиль 1967 жылдан бері Голан жоталарының басым бөлігін бақылау келеді. 2024 жылдың соңында Сирияда Баас режимі құлағаннан кейін Израиль 1974 жылғы Күштерді ажырату туралы келісімнің күшін жойды деп мәлімдеп, Сирия аумағындағы буферлік аймақ пен Шейх тауының (Хермон тауы) Сирияға тиесілі бөлігін басып алған болатын.
Сирия президенті Ахмед Шара 26 шілдеде жасаған мәлімдемесінде халықаралық тараптардың қатысуымен Израильмен қауіпсіздік туралы келісімге қол қою бағытында жұмыс жүргізіліп жатқанын айтқан.
«Егер келісімге қол жеткізілсе, Сирияның басып алынған Голан жоталарына қатысты құқықтарынан бас тартпай-ақ, жан-жақты бейбітшілікке жол ашылады», – деген еді ол.
