Біріккен Ұлттар Ұйымы зерттеушілерінің мәлімдеуінше, Израильдің палестиналық балаларды әдейі нысанаға алуы Газада жүргізіліп жатқан геноцидтің негізгі элементіне айналған.
БҰҰ-ның халықаралық тәуелсіз тергеу комиссиясы «палестиналық балалардың Израиль қауіпсіздік күштері тарапынан әдейі нысанаға алынғаны және өлтірілгені» туралы айғақтар тапқанын жариялады.
БҰҰ атынан тікелей мәлімдеме жасамайтын үш адамнан тұратын тергеу тобы алғаш рет өткен жылдың қыркүйек айындағы есебінде Израильдің Газаға қарсы соғысында геноцид жасағанын анықтаған болатын.
Жарық көрген соңғы есепте болса Израильдің әскери операцияларының қарқындылығы мен жүйелі сипатының жалғасып жатқаны, бұл жағдайдың палестиналық балалар арасында «бұрын-соңды болмаған» деңгейде өлімге, жарақаттануға және психологиялық соққыларға жол ашқаны атап өтілді.
Лауазымды тұлғалар Израиль билігі мен қауіпсіздік күштерінің Газада «геноцид қылмысын жасауды жалғастырып жатқаны» туралы қорытынды жасауға «заңды себеп» бар екенін мәлімдеді.
Газада балалық шақ «жойылды»
БҰҰ Адам құқықтары жөніндегі кеңесі тарапынан 2021 жылы құрылған комиссия ауыр физикалық және психикалық жарақаттардың, жаппай психологиялық соққылардың, тұл жетім қалудың, отбасынан ажыраудың, мүгедектіктің, қайталанатын депортациялардың, аштықтың, сондай-ақ білім беру және денсаулық сақтау жүйелерінің күйреуінің Газадағы «балалық шақты жойып жібергенін» және аймақтағы балаларға өмір бойы әсер ететінін атап көрсетті.
Тергеу жүргізуші топқа жетекшілік ететін үндістандық судья Шринивасан Муралидхар: «Израиль балаларды нысанаға ала отырып, Палестина халқының өмір сүру және өз болашағын айқындау қабілетінің дәл өзіне шабуыл жасауда. 2025 жылғы қазан айындағы бітім келісімінен кейін де балалар өлім құшып, ауыр жарақат алуын жалғастыруда», — деген тұжырымын білдірді.
