Президент Владимир Зеленский сыбайлас жемқорлыққа қарсы екі агенттіктің өкілеттігін әлсірететін заңға қол қойғаннан кейін Украина астанасы Киевте наразылықтар басталды.

Сыншылар бұл заң Зеленскийдің қолына билікті шоғырландырып, үкіметтің жоғары деңгейдегі жемқорлық істеріне араласуына жол ашады деп есептейді.

Киевте наразылық білдірушілер бұл шараға ашу-ызаларын білдірді. Кейбіреулері "заңға вето қой" деп ұрандатты.

26 жастағы ойын дизайнері Анастасия: "Бұл заңды жылдам қабылдап жатыр. Бұл арнайы бағытталған әрекет екені анық," – деді.

"Кері қадам"

Еуропа Одағының кеңею жөніндегі комиссары Марта Кос «X» әлеуметтік желісінде Рададағы дауыс беруге алаңдаушылық білдіріп, оны "маңызды кері қадам" деп атады.

Кос "НАБУ мен САПО сияқты тәуелсіз органдар - Украина үшін ЕО-ға кіру жолында маңызды. Құқық үстемдігі ЕО-ға қосылу келіссөздерінің өзегінде болады," - деп қосты.

«Transparency International» ұйымының Украинадағы бөлімшесі парламенттің шешімін сынға алып, “Бұл шешім 2014 жылғы "Құрмет революциясынан" кейінгі ең маңызды реформалардың бірін әлсіретіп, халықаралық серіктестермен сенімді бұзады» деп мәлімдеді.