Эль-Сальвадор Президенті Наиб Букеле АҚШ-та қозғалған сот ісінде бұрынғы АҚШ тұрғыны Килмар Абрего Гарсияның жоғары қауіпсіздіктегі түрмеде соққыға жығылып, психологиялық азапқа ұшырағаны туралы мәлімдемелерін жоққа шығарды.
Букеле “X” парақшасында Абрего Гарсияның "азапталмағанын, арықтамағанын" мәлімдеп, оның камерада түсірілген суреттері мен видеоларын жариялады.
"Егер ол шынымен азапталған, ұйқысыз және аш қалдырылған болса, неге барлық суретте мұнша жақсы көрінеді?" – деп жазды Букеле.
Президенттің бұл мәлімдемесі Абрего Гарсияның сәрсенбі күні АҚШ федералдық сотына берген шағымында көрген қысымдарын егжей-тегжейлі сипаттауынан кейін жасалды.
Килмар Абрего Гарсия Дональд Трамп әкімшілігі тарапынан 2024 жылы наурыз айында Эль-Сальвадорға жөнсіз депортацияланғаннан кейін елдің ең қатаң қауіпсіздік режиміндегі CECOT түрмесіне қамалғанын және ол жерде ауыр соққы, ұйқысыздық және психологиялық қысымға ұшырағанын айтты.
Абрего Гарсия өзі және тағы 20 адамның түн бойы тізерлеп отыруға мәжбүр болғанын, құлап қалған жағдайда соққыға жығылғанын баяндады. Сондай-ақ ол терезесіз, тәулік бойы шамы сөнбейтін, шамадан тыс адамдармен толтырылған камерада төсексіз темір керуеттерде ұсталатынын және санитарлық жағдайлардың өте нашар екенін жеткізді.
Абрего Гарсияның айтқандары Эль-Сальвадорда төтенше жағдай режимі кезінде ұсталған басқа тұтқындардың мәлімдемелерімен ұқсас. Бұл шара барысында ел халқының 1%-дан астамы қылмыстық топтарға қарсы күрес шеңберінде тұтқындалған болатын.
Мэрилендте тұрған Абрего Гарсия Трамп әкімшілігінің көші-қон саясаты кезінде ерекше назар аудартқан оқиғалардың бірі болды.
Оның жаңа мәлімдемелері жұбайы тарапынан Мэриленд федералдық сотына берілген шағымға қосымша тіркелді.
Трамп әкімшілігі бұл істің енді жарамсыз екенін алға тартып, Абрего Гарсияның АҚШ-қа қайтып келгенін ескеріп, федералды судьядан істі жабуды сұрады.
