АҚШ президенті Дональд Трамп Канадамен барлық сауда келіссөздерін дереу тоқтататынын мәлімдеді. Ол Канаданы бұрынғы президент Рональд Рейганның сөздерін тарифтерге қарсы жарнама науқанында бұрмалады деп айыптады.
«Олардың өрескел әрекеттеріне байланысты КАНАДАМЕН БАРЛЫҚ САУДА КЕЛІССӨЗІ ОСЫ СӘТТЕН БАСТАП ТОҚТАТЫЛДЫ», – деп жазды Трамп бейсенбі күні “Truth Social” желісінде.
Трамп сонымен бірге «Рональд Рейган қоры Канаданың жалған жарнама қолданғанын мәлімдеді.” деп жазды.
Солтүстік Америкадағы көршілер арасындағы қарым-қатынастардағы бұл күтпеген өзгеріс Канаданың премьер-министрі Марк Карнидің АҚШ-тың қатаң салығын жеңілдету үшін Ақ Үйге барғанынан екі аптадан кейін болып отыр.
Рональд Рейган қоры “X” желісінде Онтарио штаты үкіметі 1987 жылдың сәуірінде Рейганның сауда туралы радиожолдауынан «кейбір аудио және бейнематериалдарды» пайдаланғанын мәлімдеді.
Қор өкілдері жарнама Рейганның сөздерін бұрмалағанын және бұл жағдай бойынша заңды шараларды қарастырып жатқанын білдірді.
Күтпеген өзгеріс
Трамп бұл жарнаманың АҚШ Жоғарғы сотының ғаламдық тарифтер туралы шешіміне ықпал ету үшін жасалғанын алға тартты. .
Сауда келіссөздерінің кенеттен тоқтатылуы Карни үшін ауыр соққы болмақ. Трамп 7 қазандағы кездесуде Карниді «әлемдік деңгейдегі көшбасшы» деп атаған еді және олардың талқылауынан кейін Карнидің «өте риза» болатынын айтқан.
Алайда сол кезде Трамп тарифтер бойынша ешқандай жеңілдік ұсынбап еді.
АҚШ пен Канада арасындағы екі бағыттағы сауданың шамамен 85 пайызы тарифсіз жүзеге асырылуда, өйткені екі ел де “USMCA” деп аталатын Солтүстік Америкалық сауда келісіміне сәйкес әрекет етуде.
Дегенмен Трамптың ғаламдық секторлық тарифтері – әсіресе болат, алюминий және автомобильдерге қатысты – Канаданы қатты соққыға ұшыратты, жұмыс орындарының жабылуына себеп болды.
