Дүниежүзілік денсаулық сақтау ұйымының басшысы соңғы 24 сағатта Газада нөсер жауын салдарынан кемінде 10 адамның қаза тапқанын, ал мыңдаған босқынның қыста шатырларда тұрып жатқанын хабарлады.
Дүниежүзілік денсаулық сақтау ұйымының бас директоры Тедрос Адханом Гебрейесус сенбі күні әлеуметтік желіде жариялаған мәлімдемесінде, ашық аспан астында қалу, ауызсудың және санитарияның жетіспеуі, сондай-ақ шамадан тыс тығыз қоныстану тұмауды қоса алғанда жедел респираторлық инфекциялардың, сондай-ақ гепатит пен іш өту ауруларының көбеюіне әкелуі мүмкін екенін ескертті.
Ол Дүниежүзілік денсаулық сақтау ұйымының Газаға зертханалық реактивтер мен диагностикалық құрал-жабдықтарды жеткізу барысында әлі де кедергілерге ұшырап отырғанын, Израиль тарапынан көптеген материалдың «қос мақсатта қолданылатын» деп танылып, аймаққа енгізілуіне тыйым салынғанын атап өтті.
Тедрос бұл аса қажетті материалдардың шұғыл түрде кіргізілуіне рұқсат беруге шақырып, олардың ауру ошақтарын дер кезінде анықтау, алдын алу және емдеу үшін маңызды екенін айтты.
Израиль 2023 жылдың қазан айынан бері Газада 70 300-ден астам адамның өліміне себеп болды. Олардың көпшілігі ˗ әйелдер мен балалар. Сондай-ақ 171 мыңнан астам адам жараланды. Бұл геноцид атысты тоқтату режиміне қарамастан жалғасуда
Израиль армиясы 2025 жылдың 10 қазанда күшіне енген бітімді бірнеше рет бұзды. Атысты тоқтатуға қарамастан жасалған шабуылдарда Израиль күштері кемінде 386 палестиналықты өлтіріп, 1 018 адамды жаралаған.
