АҚШ президенті Дональд Трамп Венесуэла президенті Николас Мадуромен телефон арқылы сөйлескенін растады, алайда әңгіменің мазмұнына қатысты ақпарат беруден бас тартты.

Жексенбі күні Алғыс айту күнін өткізген Флоридадағы Mar-a-Lago резиденциясынан Вашингтонға оралу жолында президенттік ұшақ бортында журналистерге Трамп: “Бұл туралы пікір білдіргім келмейді. Жауап — иә,” деді.

“New York Times” жұма күні жариялаған материалында екі лидердің өткен аптада телефон арқылы сөйлескенін және жүзбе-жүз кездесу жөнінде пікір алмасқанын бірнеше дереккөзге сүйеніп хабарлаған болатын.

Соңғы күндері Венесуэла әуе кеңістігіне қатысты жасаған қатал ескертуінің жақын арада әуе шабуылы белгісі ме деген сұрақ қойылғанда, ол: “Ондай мағына іздемеңіз,” деп жауап берді.

Венесуэла президенті АҚШ елдің мұнай қорларын басып алу үшін “өлімге әкелетін әскери күш” қолдануға дайындалып жатқанын мәлімдеп, оның елдің аумағына, халқына және билік органдарына қауіп төндіріп тұрғанын айтты.

Трамп бейсенбі күнгі мәлімдемесінде АҚШ-тың “өте жақын уақытта” Венесуэлаға қарсы құрлық операциясын бастайтынын айтқан. Бұл мәлімдеме қыркүйек айынан бері теңізде жүргізілген және кемінде 83 адамның өліміне себеп болған 21 әскери шабуылдан кейін жасалды.