Иранның жоғары лауазымды шенеунігі «Reuters» агенттігіне берген сұхбатында АҚШ-пен дайындалып жатқан өзара келісімнің соңғы жобасы Тегеранның ядролық бағдарламасынан бастап Ормуз бұғазының қайта ашылуына және АҚШ-тың мұнай санкцияларына қатысты жеңілдіктерге дейінгі түрлі мәселелерді қамтитынын айтты.

Шенеуніктің сөзінше, егер екі тарап та келісім жобасын мақұлдаса, түпкілікті келісім 60 күн ішінде талқыланатын болады.

Жобада мынадай тармақтар бар:

Ормуз бұғазы

Иран Ормуз бұғазын барлық коммерциялық кеме үшін қайта ашады. Ал АҚШ Иран порттарына қатысты теңіз блокадасын алып тастайды.

Қаржылық шаралар

АҚШ түпкілікті келісімге қол жеткізілгенге дейін Иранға қарсы жаңа санкциялар енгізбейді.

Вашингтон Иранды мұнай санкцияларынан босатады. Осылайша Тегеран мұнай сатып, одан түскен табысты ала алады.

Сондай-ақ АҚШ тікелей аударымдар, өңір елдері арасындағы ынтымақтастық және қаржылық несие желілері сияқты түрлі тетіктер арқылы Иранның бұғатталған 25 миллиард доллар көлеміндегі активтерін босатуға келіседі.

Ядролық мәселелер

Тегеран ядролық қару өндірмеуге және иеленбеуге келіседі.

Иран түпкілікті келісімге қол жеткізілгенге дейін уранды өңдемеуге және ядролық нысандарын кеңейтпеуге келісе отырып, қазіргі ядролық мәртебені сақтайды.

АҚШ Тегеранның жоғары деңгейде байытылған уран қорын Иран аумағында сұйылтуына келіседі. Мұның қалай жүзеге асырылатыны 60 күн ішінде талқыланады.