АҚШ-тағы федералды мекеме бұрынғы арнайы прокурор Джек Смитке қатысты ресми тергеу бастады. Ол Дональд Трамптың президенттік қызметінің алғашқы мерзімінен кейін оған қарсы екі қылмыстық тергеуді басқарған болатын.
Арнайы өкілетті прокурорлар кеңсесі Смиттің Хэтч заңын бұзып бұзбағанын тексеріп жатқанын растады. Бұл шешім Арканзас штатынан республикалық сенатор Том Коттонның тергеу жүргізу туралы өтінішінен кейін қабылданды.
“New York Post” алғаш хабарлаған бұл тергеу Трамп пен оның жақтастары саяси қарсыластарын нысанаға алған бірқатар әрекеттің жалғасы ретінде бағалануда.
Смит 2022 жылы қараша айында Трамп өзінің сайлауалды науқанын қайта бастайтынын жариялағаннан үш күн бұрын бұрынғы Бас прокурор Меррик Гарландтың тағайындауымен арнайы прокурор қызметіне келген болатын.
Смитке Трамптың құпия құжаттарды заңсыз сақтауы мен 2020 жылы Джо Байденге жеңілген президенттік сайлау нәтижелерін өзгертуге тырысқан әрекеттеріне қатысты екі бөлек тергеу жүргізу тапсырылды.
Аталған екі тергеудің нәтижесінде Трампқа қылмыстық айып тағылды. Трамп барлық айыптарды жоққа шығарып, ешқандай заң бұзушылық жасамағанын алға тартты. Алайда бұл істер Трамп қайта президент болып сайланғаннан кейін жабылды.
«Ерекше талап»
Апта басында сенатор Коттон “X” әлеуметтік желісіндегі бірқатар жазбасында Смитті Трампқа қарсы істерді тым агрессивті түрде жүргізіп, сол арқылы оның президенттік кампаниясына нұқсан келтіруге тырысты деп айыптады. Ол Смитті «мемлекеттік қызметкер кейпіндегі саяси тұлға» деп атады.
«Арнайы прокурор Смит қалыпты сот тәртібін айналып өтіп, тікелей Жоғарғы сотқа жүгінуге тырысты, алайда бұл ерекше талаптың неге қабылдануы керектігі туралы еш негіз келтірмеді», – деді ол.
«Сондықтан мен 2024 жылғы сайлауға жасалған бұл бұрын-соңды болмаған араласуды Арнайы өкілетті прокурорлар кеңсесі шұғыл түрде тергесін деп талап еттім», – деп қосты ол.
Смит Трамп жеңіске жеткеннен кейін Әділет департаментінің қызметтегі президентті сотқа тартпау қағидасына сілтеме жасап, екі істі де жапты. Алайда ол қаңтар айында жариялаған есебінде жиналған айғақтардың Трампты сотта айыптауға жеткілікті екенін атап өтті.
Трамп ешқандай заң бұзушылық жасамағанын айтып, бұл істерді өзінің сайлауалды науқанына нұқсан келтіруді көздеген саяси астары бар әрекеттер деп сипаттады.
