Түркия Сыртқы істер министрі Хакан Фидан Венада Халықаралық демократтар одағы (UID) ұйымдастырған «Жаһандық белгісіздік дәуіріндегі Түркияның сыртқы саясаты» атты іс-шарада сөз сөйледі.

Фидан Түркияның өз географиясында сенімді мекен, қауіпсіз арал және өсіп келе жатқан жұлдыз екенін атап өтіп, аймақта бейбітшілік пен дамуды көздейтінін баса айтты.

Түркияның Израильдің Газаға жасаған шабуылдарынан кейінгі жұмыстарына тоқталған Фидан түрлі елдермен бірлесе отырып, геноцидті тоқтату үшін дипломатиялық қысым топтарын құрғандарын жеткізді. Ол Израильдің өз мақсаттарынан бас тартпағанын, бірақ қысымды жалғастыру қажеттігін және бұл процесте қолдау көрсетіп жатқан елдердің бар екенін айтты.

Кейбір елдердің Ресей-Украина соғысында, ал кейбірінің Газада атысты тоқтату үшін жеткілікті күш салмай жатқанына нұсқаған Фидан Түркияның екі жағдайда да атысты тоқтатуды мақсат ететінін мәлімдеді.

Фидан Иран-АҚШ соғысында да мәселелердің диалог арқылы шешілуін қолдайтынын айта келе: «Біздің басты ерекшелігіміз – жүргізіп отырған саясатымыздағы тұрақтылық. Бір нүктеде не қаласақ, қандай принципті ұстансақ, басқа жерде де дәл сондай принциппен қараймыз», — деді.

Газадағы геноцидтің де, Холокосттың да қате екенін атап көрсеткен Фидан олардың бірін сынап, екіншісін елеусіз қалдыруды «тұрақсыз ұстаным» деп бағалады. Ол: «Осындай қайшылықтарға толы халықаралық қатынастар деңгейінде Түркияның принциптерге сүйеніп, айналасындағы дағдарыстарға адамгершілікпен және ізгілікпен қарауы өте маңызды», — деді.

Фидан аймақтың жылдар бойы ішкі соғыс, террор, оккупация және өлім-жітіммен бетпе-бет келгенін, аймақ елдерінің сырттан келетін «гегемоннан» көмек күтетінін айтты. Алайда ол «гегемондардың» аймақтан кеткенде артына бұдан да үлкен мәселелер қалдырып кететінін баса айтты. Аймақ халқының өз тағдырына ие болмауын «сәтсіздік пен дәрменсіздік» деп атаған Фидан мәселелерді аймақ ішінде, өз күштерімен шешу қажеттігін алға тартты.