Сирияның «SANA» мемлекеттік ақпарат агенттігінің хабарлауынша, Израиль жұма күні таңертең Сирияның Дараа аймағындағы нысандарды атқылаған.

Шабуыл Ярмук аңғарының батыс бөлігінде орналасқан Мария мен Абдин ауылдарының арасындағы егіс және орман алқаптарына бағытталған.

Шабуыл салдарынан қаза тапқандар немесе елеулі материалдық шығын туралы ақпарат жарияланған жоқ.

Соңғы айларда Сирияның оңтүстігінде Израильдің әскери белсенділігі айтарлықтай артты. Өңірде рейдтер, тұрғын үйлерді тінту, бақылау-өткізу бекеттерін орнату, сондай-ақ балалар мен малшыларды қоса алғанда бейбіт тұрғындарды ұстап әкету оқиғалары жиілеген.

2024 жылдың желтоқсанында Башар Асад режимі күйрегеннен кейін Израиль 1974 жылғы Күштерді ажырату туралы келісімнің жойылғанын айтып, шекара бойындағы буферлік аймақты бақылауға алды.

Сирияның жаңа билігі Израильге қауіп төндірмесе де Израиль күштері Сирия аумағына бірнеше рет әуе соққысын жасап, салдарынан бейбіт тұрғындар қаза тапты. Сондай-ақ әскери нысандар, техника мен оқ-дәрі қоймалары нысанаға алынды.