«Google Cloud»-тың Батыс Еуропадағы деректер орталықтарында бірқатар қызметтің жұмысына әсер еткен техникалық ақаулар мен желілік үзілістер тіркелді.

«Google» компаниясының мәліметтеріне сәйкес, Лондонда орналасқан «europe-west2» аймағында көптеген қызметке қол жеткізуде елеулі қиындықтар туындаған.

Техникалық ақау «BigQuery» деректерді тасымалдау қызметіне, бұлттық файл сақтау жүйесіне, бұлтта қосымшаларды іске қосу қызметіне, «Google» қосымшаларын әзірлеу және орналастыру платформасына, бұлттық деректерді өңдеу жүйесіне, «Google Cloud NetApp» деректерді сақтау қызметіне, бұлттық хабар алмасу және оқиғаларды жеткізу жүйесіне, «Google» бұлттық сақтау қызметіне, виртуалды серверлер жүйесіне, «Google Kubernetes» контейнерлерін басқару қызметіне, «Looker» платформасының негізгі нұсқасына, «Apache Airflow» және «Apache Kafka» қызметтеріне, тұрақты дискілік сақтау және деректерді көшіру жүйелеріне әсер еткен.

Ақау кейбір қаржылық технология компанияларының жұмысына да кері әсерін тигізген.

Көптеген пайдаланушы Ұлыбританияда орналасқан «Revolut» банк қызметіне қол жеткізе алмай отырғанын хабарлады. Сондай-ақ «Lloyds» банк тобына қарасты «Halifax» қызметтерінің жұмысында да қиындықтар туындаған.

«Google Cloud» компаниясы бүгін «europe-west2» аймағында бірнеше қызметтің жұмысында ақау болғанын растады. Компания өкілдері оның себебі анықталып жатқанын және мәселені шешу үшін жұмыстар жүргізіліп жатқанын мәлімдеді.