Сауд Арабиясы Лусаил стадионында Палестинаны қосымша уақытта 2:1 есебімен жеңіп, «FIFA» Араб кубогы Катар-2025 турнирінің жартылай финалына жолдама алды.
Ойынның 58-минутында Фирас әл-Бурайкан пенальтиді сәтті орындап, Сауд Арабиясын алға шығарды.
Палестина бұған жылдам жауап қайтарды: 64-минутта Одай Даббаг есепті теңестірді.
Негізгі уақыт 1:1 есебімен аяқталған соң, ширек финал қосымша уақытқа ұласты. Қосымша уақыттың 115-минутында турнирдің көзге түскен ойыншыларының бірі әл-Досари асырған допты Мұхаммед Канно баспен дәл соғып, Сауд Арабиясына жеңіс сыйлады.
Осылайша Сауд Арабиясы жұма күні өтетін Иордания - Ирак матчының жеңімпазымен жартылай финалда кездеседі.
Сарапшылар жеңіліске қарамастан, матчтың көптеген кезеңінде Палестинаның Сауд Арабиясына қарағанда нәтижелі ойын көрсеткенін атап өтті.
Палестиналық футболшылар ала доп додасында басымдық танытып, шешуші сәттердегі үздіксіз шабуыл тактикасымен қарсыласқа айтарлықтай қиындық тудырды.
Сыншылар Палестинаның кубокпен абыройлы қоштасуы жанкүйерлердің командаға деген сенімін нығайтып, алдағы уақытта мықты қарсыластармен кездесулерге сенім бергенін атап өтті.
