Еуропалық комиссия төрағасының орынбасары әрі Сыртқы істер және қауіпсіздік саясаты жөніндегі жоғарғы өкілі Кая Каллас, Еуропалық комиссияның Даму мәселелері жөніндегі мүшесі Марта Кос және Ішкі істер мен көші-қон мәселелері жөніндегі мүшесі Магнус Бруннер бүгін Түркияға ресми сапармен келеді.

Комиссия мүшелері Түркия Сыртқы істер министрі Хакан Фиданмен кездеспек.

Кездесу барысында Хакан Фидан Түркияның Еуропалық одаққа толыққанды мүшелікке ұмтылысы президент Ердоған айқындаған көзқарасқа сәйкес елдің негізгі стратегиялық басымдықтарының бірі болып қала беретінін мәлімдейді. Сондай-ақ қазіргі жаһандық сын-қатерлер күшейген кезеңде Түркия мен ЕО арасындағы қарым-қатынасты ортақ мүдделер негізінде әрі сындарлы арнада дамытуға ықпал ететін ұстанымның маңызын атап өтпек.

Министр Фидан ЕО-ның кеңею үдерісі әділдік қағидаттарын негізге ала отырып жалғасуы қажет екенін жеткізеді.

Осыған байланысты министр Түркия мен ЕО қатынастарына шектеу қоятын, 2019 жылдың 15 шілдесінде қабылданған ЕО Сыртқы істер кеңесінің шешімдерінің толық күшін жою қажеттігін атап өтпек. ЕО-ны нақты әрі сындарлы қадам басуға шақырып, 2025 жылдың 15 шілдесіндегі Шенген визасын рәсімдеуді түрік азаматтары үшін жеңілдетуді көздейтін шешімнің тиімді іске асырылуы және оның түрік жүк көлігі жүргізушілерін қоса алғанда барлық санаттағы азаматтарды қамтуы қажет екенін мәлімдемек.

Еуропалық комиссия мүшелерінің Түркияға ресми сапары  ̶  ЕО-ның өзгеріп жатқан жаһандық жағдайда Түркиямен қарым-қатынасқа ерекше мән бере бастағанының көрінісі.

Сонымен қатар Еуропалық кеңес төрағасы Антониу Кошта мен Еуропалық комиссия төрайымы Урсула фон дер Ляйеннің де 7–8 шілдеде Анкарада өтетін НАТО саммиті аясында Түркияға келмек.

Еуропалық одақ – Түркияның ең ірі сауда серіктесі, ал Түркия – ЕО-ның бесінші ірі сауда серіктесі. 2025 жылы Түркия мен ЕО арасындағы тауар айналымы шамамен 233 миллиард АҚШ долларына жетті.