Дипломатиялық дереккөздердің мәліметінше, министр Фиданның Мәскеуге сапары аясында Ресей президенті Владимир Путин, әріптесі Сергей Лавровпен және басқа да жоғары лауазымды тұлғалармен кездесуі жоспарланған. Сонымен қатар Фидан Ресейде жұмыс істейтін түрік кәсіпкерлерімен де жүздеседі.
Министр Фиданның кездесулері барысында екі ел арасындағы қарым-қатынастың өңірлік тұрақтылық пен әл-ауқат үшін стратегиялық маңызына назар аударылады. Сауда, энергетика және қауіпсіздік салаларын қоса алғанда, екіжақты қатынастарға қатысты техникалық және дипломатиялық мәселелер жан-жақты талқыланады.
Түркия келіссөздерге қайтадан алаң ұсынуға дайын
Сапар аясында талқыланатын басты мәселелерінің бірі Ресей мен Украина арасындағы соғыс болмақ. Министр Фидан Түркияның тұрақты бейбітшілікке қол жеткізуге бағытталған дипломатиялық күш-жігерге берік екенін білдіріп, Анкараның 2022 және 2025 жылдардағыдай тараптар арасындағы келіссөздердің жаңа кезеңіне де алаң ұсынуға дайын екенін мәлімдейді деп болжануда.
Фидан Қаратеңіздегі шиеленістің күшеюі жаһандық қауіп төндіріп отырғанына назар аударып, Түркия ұсынған кеме қатынасы қауіпсіздігі тетігі мен энергетикалық инфрақұрылымдар және порттарды қамтитын бітімгерлік ұсыныстың әлі де өзекті екенін атап өтеді.
Экономикалық байланыстар мен энергетикадағы маңызды кезең
2010 жылы құрылған Жоғары деңгейдегі ынтымақтастық кеңесі аясында дамып келе жатқан екіжақты қатынастардың экономикалық көрсеткіштері назар аударады. 2025 жылы Түркия мен Ресей арасындағы тауар айналымы 49 миллиард АҚШ долларынан асты, ал Түркияға келген ресейлік турист саны 6,9 миллион адамға жетті.
Энергетика саласындағы ең ірі бірлескен жобалардың бірі – Аккую атом электр станциясы (АЭС) жобасы да шешуші кезеңге аяқ басты. Жоба аясында алғашқы реакторды биыл іске қосу жоспарланып отыр.
Министр Фидан Ресейге соңғы сапарын 2025 жылғы мамыр айында жасаған болатын. Ал Сергей Лавровпен соңғы рет 2026 жылғы сәуірде Анталия дипломатиялық форумы аясында кездескен еді.
