Трамп бұл мәлімдемесін “Truth Social” әлеуметтік желісінде жасап, Пауэллға қатысты “Bloomberg” агенттігі жариялаған мақалаға сілтеме жасады. Онда Федералдық Тұрғын үй қаржыландыру агенттігінің директоры Уильям Пульте Конгресті Пауэллға қарсы тергеу бастауға шақырған болатын.

Пауэллдың лақап есімін қолданып, « “Өте Кеш” дереу отставкаға кетуі керек!!!» деп жазған Трамп Пультенің талаптарына жанама қолдау көрсетті.

Уильям Пульте Пауэллды «саяси бейтараптықтан ауытқу» және «Сенат тыңдауларында жалған ақпарат беру» сияқты айыптармен Конгрестік тергеуге тартуға шақырды. Сондай-ақ ол Федералдық резерв жүйесінің 2,5 миллиард долларлық штаб-пәтерін жөндеу жобасына байланысты Пауэллды жалған мәлімдеме жасады деп айыптап, бұл жағдайды «ашық тәртіп бұзушылық» деп атады.

Пауэлл алғаш рет Трамптың өзі тарапынан алғашқы президенттік мерзімінде Федералдық резерв жүйесінің төрағалығына ұсынылған болатын. Алайда Трамп оның «пайыздық мөлшерлемені төмендетуді кешіктіргені» үшін Пауэллды бірнеше мәрте сынға алған. Кейіннен АҚШ президенті болған Джо Байден Пауэллды екінші мерзімге қайта ұсынды.