Ақ Үй АҚШ президенті Дональд Трамп АҚШ-тың Біріккен Ұлттар Ұйымының құрылымдарын қоса алғанда, ондаған халықаралық ұйымнан шығуын көздейтін меморандумға қол қойғанын мәлімдеді.
Ақ Үй сәрсенбі күні жасаған мәлімдемесінде «Бүгін президент Дональд Трамп АҚШ-тың бұдан былай Америка мүддесіне қызмет етпейтін 66 халықаралық ұйымнан шығуын көздейтін президенттік жарлыққа қол қойды. Олардың қатарында БҰҰ-дан тыс 35 және БҰҰ-ға қарасты 31 ұйым бар», - делінген.
Ақ Үй ұйымдардың тізімін жарияламады, алайда олардың АҚШ-тың егемендігі мен экономикалық қуатына қайшы келетін радикалды климаттық саясатты, жаһандық басқару үлгілерін және идеологиялық бағдарламаларды қолдайтынын атап өтті.
Мәлімдемеде бұл қадам АҚШ мүшесі саналатын барлық халықаралық үкіметаралық ұйым, конвенция мен келісімді кешенді түрде қайта қараудың нәтижесінде басылғаны атап көрсетілді.
Ақ Үйдің мәлімдеуінше, бұл ұйымдардан шығу АҚШ-та салық төлеушілердің қаражатын Американың басымдықтарын екінші орынға ысырып, маңызды мәселелерді тиімсіз, әрі нәтижесіз түрде қарастыратын ұйымдарға көмекті тоқтатады. Осылайша АҚШ салық төлеушілердің қаражатын орынды қолданатын болады.
Екінші президенттік мерзімін бір жыл бұрын бастаған Трамп АҚШ-тың Біріккен Ұлттар Ұйымына бөлетін қаржысын қысқартуға, АҚШ-тың БҰҰ Адам құқықтары жөніндегі кеңесімен өзара іс-қимылын тоқтатуға, палестиналықтарға көмек көрсететін «UNRWA» ұйымына бөлінетін қаржыны қысқартуға және БҰҰ-ның мәдениет жөніндегі агенттігі «UNESCO»-дан шығуға ұмтылды.
Сондай-ақ АҚШ президенті Дүниежүзілік денсаулық сақтау ұйымынан және Климат жөніндегі Париж келісімінен шығу жоспарларын да жариялады.
