БҰҰ Мозамбиктің солтүстігіндегі зорлық-зомбылықтан қашқан бейбіт тұрғындардың санына қатысты «аса алаңдаушылық» білдіріп, соңғы айларда шамамен 300 000 адамның үйін тастап кетуге мәжбүр болғанын хабарлады.

“ACLED” жаһандық қақтығыс мониторинг тобының хабарлауынша, Кабо Делгадо провинциясындағы көтеріліс 6 200-ден астам адамның өліміне әкелді. Зорлық-зомбылық көрші Нампула провинциясына да жайылды.

БҰҰ Босқындар агенттігі сейсенбі күні соңғы екі аптада шамамен 100 000 адамның аймақтан қашуға мәжбүр болғанын хабарлады.

Агенттік өкілі Хавиер Крич соңғы үш айда «кемінде 287 000» адамның қоныс аударуға мәжбүр болғанын айтты.

Женевада журналистерге берген сұхбатында Крич бұл көрсеткіштің тек ресми тіркелген адамдарды қамтитынын және «өте көп» жағдайдың тіркеусіз қалғанын атап өтті. «Шілдеден бері кемінде 300 000 адамның қоныс аударғаны туралы айтуға болады деп ойлаймын», -деді ол.

«Шабуылдардың күшеюі»

Агенттік содан бері «ауылдарға жасалған шабуылдардың күшейгенін және қақтығыстың бұрын қауіпсіз болған аймақтарға жылдам таралғанын» байқағанын, бұл гуманитарлық көмек көрсетуді одан әрі қиындатқанын мәлімдеді.

UNHCR мәлімдемесінде: «Гуманитарлық ұйымдар қосымша қолдау мен ресурстарсыз көмек көрсетуді жалғастыра алмайды», - деп «жедел халықаралық қолдау» қажеттігіне назар аударды.

2017 жылынан бері Мозамбикте 1,3 миллионнан астам адам қоныс аударған.