АҚШ Орталық қолбасшылығы (CENTCOM) Ирандағы әскери нысандарға жаңа шабуыл жасағанын хабарлады.
CENTCOM ұйымының “X” әлеуметтік желісіндегі ресми парақшасында жарияланған мәлімдемеде АҚШ күштерінің сағат 18:45-те Ирандағы әскери нысандарға шабуыл бастағаны айтылды.
Мәлімдемеде бұл шабуылдың «Иранды жауапкершілікке тарту және Иран Ислам революциясы сақшылар корпусының (IRGC) коммерциялық кемелерге төндіретін қауіп-қатерін азайту мақсатында жүзеге асырылған 13-кезекті соққы» екені көрсетілді.
Ал Иран бұқаралық ақпарат құралдары АҚШ-тың Ирак шекарасына жақын орналасқан Ахваз қаласын зымырандармен атқылағанын және Ормуз бұғазы маңындағы аудандарда жарылыс дауыстары естілгенін хабарлады.
Иран мемлекеттік телеарнасының мәліметінше, АҚШ Иракпен шекаралас Хузестан провинциясындағы Ахваз қаласының маңындағы бірнеше нысанға зымыранмен соққы жасаған.
Хабарда Ахваз қаласының жеті түрлі ауданында жарылыс дауыстары естілгені, сондай-ақ Хузестан провинциясындағы Әндимешк қаласының маңында да жарылыстар болғаны айтылды.
Сонымен қатар Ормуз бұғазындағы Кешм аралының оңтүстік жағалауынан да жарылыс дыбыстары естілгені хабарланды.
Жартылай ресми “Fars” ақпарат агенттігі Ормуз бұғазына жақын орналасқан Хормозган провинциясындағы Бендер-Аббас қаласының маңында да жарылыс болғанын мәлімдеді.
Иран БАҚ-тарының Хормозган провинциясы билігіне сілтеме жасап хабарлауынша, АҚШ-тың Бендер-Аббас портына жасаған шабуылдары салдарынан екі адам жараланған.
