Бельгияда өткен жалпы ереуіл елдің екі негізгі әуежайындағы рейстердің басым бөлігінің тоқтауына себеп болып, Брюссельдегі қоғамдық көліктерге кедергі келтірді.
Сейсенбі күні өткен ереуіл үкіметтің зейнетақы және еңбек нарығын реформалау туралы ұсыныстарына қарсы биыл ұйымдастырылған наразылықтардың соңғысы болды.
Брюссель халықаралық әуежайынан ұшуы тиіс барлық рейстер мен қонуы жоспарланған рейстердің шамамен жартысы тоқтатылды. Әуежайдың баспасөз хатшысы рентген тексеру қызметін көрсететін қауіпсіздік компаниясының қызметкерлері сейсенбі күні жұмысқа шықпағанын мәлімдеді.
Әуежайдың интернет сайтындағы мәліметке сәйкес, Брюссельден 60 км оңтүстікте орналасқан Шарлеруа әуежайында барлық рейс тоқтатылды.
Мыңдаған адам қала орталығынан өтетін ауқымды шеруге қатысу үшін Брюссельдегі “Gare du Nord” теміржол бекетіне жиналды.
Ереуілдің салдарынан Брюссельдегі метро, автобус және трамвай бағыттарының көбі тоқтап қалды. Қоғамдық көлік операторы “STIB” әлеуметтік желі платформасы “X” арқылы бұл ақпаратты растады.
“Бізге шын мәнінде түрткі болған нәрсе”
Полиция сейсенбі күні таңертең қаланың ірі даңғылдарының кейбірінде от жағылғанын, бұның салдарынан көлік қозғалысының одан әрі қиындағанын хабарлады. Жергілікті БАҚ полицейлердің бірнеше наразылық танытушыны ұстағанын мәлімдеді.
Елдің негізгі кәсіподақтары жетекшілік еткен және “Greenpeace” пен “Oxfam” сияқты белсенді топтар қолдаған ереуілшілер премьер-министр Барт Де Вевер басқаратын федералдық коалициялық үкіметтің мемлекеттік шығындарды қысқартуды көздейтін реформаларына қарсы шықты.
“FGTB” кәсіподағының жетекшісі Тьерри Бодсон сейсенбі күні француз тілінде хабар тарататын мемлекеттік радиостанция “RTBF”-ке берген сұхбатында: «Бізге шын мәнінде түрткі болған нәрсе — зейнетақы»,- деді.
Бодсон реформаның тек болашақ зейнеткерлердің табысын азайтып қана қоймай, мемлекеттік зейнетақы мөлшерін есептеу тәсілін өзгертіп, белгісіздік туғызатынын да атап өтті.
“FGTB” ұйымының интернеттегі ресми дерегіне сәйкес, кәсіподақтың 1,5 миллионнан астам мүшесі бар.
Жаңа Фламанд одағы (N-VA) партиясының мүшесі Де Вевер ақпан айында премьер-министр қызметіне кірісті және қазіргі таңда негізінен оңшыл бағыттағы коалицияны басқарып отыр. Салықты көбейтпей бюджет тапшылығын азайтуға уәде берген Де Вевер келер жылдың бюджетін қалыптастыруда қиындықтарға тап болуда.
