Африка одағы комиссиясының төрағасы Махамуд Али Юсуф сәрсенбі күні жасаған мәлімдемесінде: «Құқық үстемдігі қарулы күштерден жоғары тұруы тиіс,» - деп, ұйымның елді мүшеліктен шеттету туралы шешімі дереу күшіне енгенін хабарлады.
Мадагаскар президенті Андри Раджоэлина бірнеше аптаға созылған үкіметке қарсы «Z ұрпағы» наразылықтарынан кейін өз қауіпсіздігіне алаңдап, елден кетуге мәжбүр болды.
Бұл толқуларға су мен электр энергиясының жиі өшірілуіне наразылық білдірген кейбір әскери топтар да қосылған болатын. Раджоэлинаның бүкіл үкіметті тарату туралы шешімі халық арасындағы отставкаға шақыруды күшейтті.
Эмиграцияда жүрген Раджоэлина ұлттық парламентті жарлықпен таратуға тырысқанымен парламент бұл шешімді мойындамай, сейсенбі күні оны импичментке ұшырату туралы отырыс өткізді.
Бұдан көп ұзамай, полковник Майкл Рандрианирина бастаған таңдаулы CAPSAT әскери бөлімі билікті өз қолына алғанын, бірқатар мемлекеттік мекемені таратқанын және өтпелі үкімет құратынын мәлімдеді.
Бұдан былай адам шығыны болмауы тиіс
Майкл Рандрианирина сәрсенбі күні журналистерге берген сұхбатында Жоғарғы конституциялық соттың оны бұл қызметке шақырғанын айтып, жақын арада президент ретінде ант беретінін мәлімдеді.
Сол күні Оңтүстік Африка даму қоғамдастығы (SADC) бұрын француз отары болған бұл арал еліндегі шиеленісті азайту мақсатында ақсақалдар кеңесін тағайындады.
Қоғамдастықтың Саясат, қорғаныс және қауіпсіздік жөніндегі ынтымақтастық органы төрағасы әрі Малави президенті Питер Мутарика бұл кеңеске бұрынғы Малави президенті Джойс Банда жетекшілік ететінін және оның ел көлемінде сабырлықты, бейбітшілікті және диалогты орнату миссиясын атқаратынын айтты.
Мутарика өз сөзінде: «Малагасий халқының толқулар салдарынан бұдан былай қаза табуына жол берілмеуі керек,» - деді.
