Израиль армиясының атысты тоқтату режиміне қарамастан Газа секторына жасаған шабуылдарынан төрт палестиналық қаза тапты.

Палестинаның ресми «WAFA» ақпарат агенттігінің хабарлауынша, Газа қаласының оңтүстік-шығысындағы Зейтун ауданында орналасқан Дәулә жолайрығы маңын Израиль артиллериясы атқылап, салдарынан бір адам қаза тауып, үш адам жараланған. Қаза тапқан және жараланған палестиналықтар Газа қаласындағы Әл-Аһли ауруханасына жеткізілген.

Израиль әскери ұшақтарының Газа қаласының солтүстік-шығысындағы Туффах ауданында орналасқан Санафур жолайрығы маңына жасаған әуе шабуылынан екі адам қаза тауып, көптеген адам жараланды. Қаза тапқандар мен жараланғандар Газаның батысындағы Шифа ауруханасына жеткізілген.

Палестина Қызыл Жарты Ай қоғамы Израиль армиясының Газа қаласының батысындағы порт аймағына жасаған әуе шабуылынан бір адамның қаза тапқанын мәлімдеді.

Израиль армиясы 2025 жылдың 10 қазанында күшіне енген атысты тоқтату келісіміне қарамастан, Газа секторына әуеден және құрлықтан шабуыл жасауды, сондай-ақ тұрғындарды эвакуациялау туралы бұйрық шығаруды жалғастыруда

Газадағы Палестина Денсаулық сақтау министрлігі кеше жасаған мәлімдемесінде Израильдің 2023 жылдың қазан айынан бергі шабуылдарынан 73 246 адамның қаза тауып, 173 727 адамның жараланғанын хабарлады.