Ұлыбританияның “Financial Times” басылымы дүйсенбі күні хабарлағандай, Қытай өткен аптада шағын ұшақ Пекиндегі ең биік ғимаратқа соғылған оқиғадан кейін жеке авиация операторларының жеңіл тіркелген қанатты ұшақтармен ұшуына шектеу енгізді.
Жұма күні “China Zun” атауымен де белгілі “CITIC” мұнарасына соғылған ұшақтың апаты салдарынан ұшқыш қаза тауып, 13 адам жараланды.
Басылым үш шағын бұрандалы ұшақ операторына және бір планер компаниясына сілтеме жасап, аталған кәсіпорындардың ұшу қызметі оқиғадан кейін уақытша тоқтатылғанын хабарлады.
Сондай-ақ ұлттық әуе кеңістігін бақылау туралы бұйрық аясында ойын-сауық мақсатындағы ұшуларға қатысты парашютпен секіру және параплан қызметтері де уақытша тоқтатылғаны айтылды.
Шектеулердің қанша уақытқа созылатыны әзірге жарияланған жоқ.
Апатқа ұшыраған әуе кемесі – Қытайда шығарылған екі орындық “Sunward SA60L Aurora” жеңіл спорттық ұшағы.
Оқиға орнынан түсірілген бейнежазбаларда соқтығысудан кейін биіктігі 528 метр мұнарадан ұшақтың бөлшектері төменге құлағаны, ал құйрық бөлігі жерге түскені көрінеді.
Пекиннің жергілікті билік органдары тергеу басталғанын мәлімдеді.
“Financial Times” басылымы “Flightradar24” әуе қозғалысын бақылау қызметінің деректеріне сүйене отырып, аталған оқиғадан кейін сенбі күні Қытайда жүк және коммерциялық авиациядан өзге әуе кемелерінің ұшу белсенділігі күрт төмендегенін хабарлады.
Осы жылдың басында Пекин билігі елорда аумағының басым бөлігінде ұшқышсыз ұшу аппараттарының ұшуына тыйым салатын жаңа ережелерді енгізген болатын.
