Режеп Тайып Ердоған балалар ешқашан соғыс пен қақтығыстың, кедейліктің ауыртпалығын көтермеуі керектігін атап өтіп, бейбітшілік пен қауіпсіздікте өмір сүру олардың ең басты құқығы екенін айтты.
Президент Анкарада TRT Телерадиокорпорациясының бейсенбі күні өткен 23 сәуір Балалар мерекесіне арналған 48-ші Халықаралық бағдарламасында сөз алып, өңірде бейбітшілікті қайта орнату бағытында күш-жігер жалғасып жатқанымен, жазықсыз балалардың соғыс пен қысымнан ең көп зардап шегіп отырғанын жеткізді.
Іс-шара барысында балаларға үн қатқан Ердоған: «Соғыссыз, қақтығыссыз, жанжалсыз елде және әлемде өмір сүру – сендердің ең басты құқықтарың», – деді.
Ол барлық дипломатиялық күш-жігерге қарамастан, зорлық-зомбылық пен әділетсіздік өңірді күйретіп жатқанын ескертті.
«Өкінішке қарай, барлық талпынысқа қарамастан, өңірімізде соғыс пен қысым тоқтамай отыр. Бұл соғыстан көбіне бейкүнә балалар зардап шегуде», – деді.
Балалар үшін жарқын болашақ
Режеп Тайып Ердоған Түркияның қақтығыстарды тоқтату және балалардың тұрақсыздық пен зорлық-зомбылықтың құрбанына айналуына жол бермеу үшін жұмыс істеп жатқанын айтты.
«Қақтығыстарды тоқтатып, балалардың зардап шекпеуі үшін бар күшімізді салып жатырмыз. Біздің жалғыз мақсатымыз – әлем балаларының бейбітшілік, қауіпсіздік және бауырластықта өмір сүруі», – деді ол.
Президент Түркияның басты басымдығы – балалар қорықпай өсіп, қауіпсіздік пен үмітке қол жеткізе алатын болашақты қалыптастыруға үлес қосу екенін атап өтті.
Ердоған бұл мәлімдемесін Түркияның балаларға арналған ең маңызды ұлттық мерекелерінің бірі 23 сәуір Ұлттық егемендік және балалар күнінде жасады.
