Түркия Сыртқы істер министрлігі осы мәселеге қатысты жазбаша мәлімдеме жасады.

Мәлімдемеге сәйкес, Оңтүстік Кореяның Пусан қаласында өткен Біріккен Ұлттар Ұйымының Білім, ғылым және мәдениет жөніндегі ұйымы (ЮНЕСКО) Дүниежүзілік мұра комитетінің 48-сессиясында Түркияның 2027 жылы өтетін 49-сессияны ұйымдастыруы мақұлданды.

Комитеттің 49-сессиясын 2027 жылы 27 маусым мен 7 шілде аралығында Стамбул қаласында өткізу жоспарланып отыр.

Мәлімдемеде Түркияның адамзаттың ортақ мұрасы саналатын мәдени және табиғи құндылықтарды қорғауға бағытталған халықаралық ынтымақтастыққа өз үлесін қосуды жалғастыратыны атап өтілді.

Шешім бірауыздан қабылданды

Министрлік дереккөздерінің мәліметінше, Түркияның аталған сессияға қабылдаушы ел болуы туралы шешім бірауыздан қабылданды. Сонымен қатар, сол сессия барысында Түркияның ЮНЕСКО жанындағы тұрақты өкілі, елші Мұстафа Юрдакул Дүниежүзілік мұра комитетінің 49-сессиясының төрағасы қызметін атқаруға кірісті.

Түркия 2023 жылы Дүниежүзілік мұра комитетінің 2023–2027 жылдарға арналған мүшелігіне рекордтық дауыс санымен сайланған болатын.

Қазіргі уақытта Түркияның ЮНЕСКО-ның Дүниежүзілік мұралар тізіміне енгізілген 22 мәдени және аралас мұра нысаны бар.

ЮНЕСКО-ның Дүниежүзілік мұра комитеті

ЮНЕСКО-ның Дүниежүзілік мұра комитеті 1972 жылғы «Дүниежүзілік мәдени және табиғи мұраны қорғау туралы конвенция» аясында құрылған және осы конвенцияның орындалуына жауапты шешім қабылдаушы орган ретінде қызмет етеді.

Комитет төрт жыл мерзімге сайланатын 21 мүше мемлекеттен тұрады. Ол Дүниежүзілік мұралар тізіміне жаңа нысандарды енгізу, тіркелген нысандардың сақталу жағдайын бағалау, Қауіп төнген дүниежүзілік мұралар тізіміне қатысты шешімдер қабылдау және Дүниежүзілік мұра қорын пайдалану мәселелерін қарастырады.