Барзак соғыстың бейбіт тұрғындарға әсерін құжаттап, бір дәмханада түсірген материалдарын жүктеп отырған сәтте Израильдің әуе шабуылына ұшырады.
Палестина БАҚ-тарының хабарлауынша, шабуылдан Барзакпен бірге тағы бес адам көз жұмды.
Денсаулық сақтау қызметкерлерінің мәліметінше, сейсенбі күні Газада жасалған Израиль соққыларынан жүкті әйел мен бір баланы қоса алғанда кемінде 58 палестиналық қаза тапқан.
Палестина дереккөздері Дейр-әл-Балахтағы шабуыл ағаш ұстасы шеберханасын да нысанаға алғанын хабарлады.
Барзак пен өзгелер қаладағы Шеңбер көшесінің маңында қаза тапты.
Журналист өзінің “Instagram” парақшасында соңғы жазбасында Израильдің бомбалауынан және мәжбүрлі қоныс аудару қаупінен Газа қаласынан оңтүстікке кетуге мәжбүр болғанын жазып, “Денем оңтүстікке кетсе де, жүрегім әлі де Газа қаласында,” деген еді.
Түркия шабуылды айыптады
Түркия Республикасы Президент аппараты жанындағы Коммуникациялар басқармасының басшысы Бурханеттин Дуран Барзакты “басқыншылық пен қысымның көлеңкесінде шындықты іздеген батыл дауыс” деп сипаттады.
Дуран: “Оның оқиғасы ‘TRT World’-тің ‘Газа суреттерімде’ атты деректі фильмінде қамтылып, әлемге шындықты жеткізуге деген табандылығын көрсетті. Журналистерге жасалған шабуылдар шындықты ешқашан тұншықтыра алмайды. Яхияға Алладан рақым тілейміз, отбасына, әріптестеріне және жақындарына көңіл айтамыз,” деді.
TRT Бас директоры Захид Собаджы да шабуылды қатаң айыптап, Барзактың қаза болуы Газадағы журналистердің қандай қауіп-қатерлерге тап болып отырғанын тағы бір мәрте еске салғанын айтты.
Собаджы: “Өте қиын жағдайда жұмыс істеген әріптесіміз Яхия Барзактың қазасына қатты қайғырамыз. Израиль журналистерді нысанаға алып, адамзатқа қарсы жасап отырған қылмыстарын жасыра алмайды, есеп беретін күн ерте ме, кеш пе міндетті түрде келеді,” -деді.
Барзак Газада жаңа туған нәрестелердің фотографы ретінде кеңінен танылған еді. Соғысқа дейін оның “Instagram” парақшасы Газа қаласындағы жеке студиясында түсірілген, мұқият өңделген сәби портреттеріне толы болатын.
Ал Израиль шабуылдары басталғалы бері оның парақшасы қара сызықтармен белгіленген, өлім мен қираудың символына айналған әсерлі суреттерге толды. Сонымен қатар геноцид сипатты соғыста қаза тапқан балаларды еске алатын бейнежазбалар да жариялап отырған.
Барзак 2023 жылғы 7 қазаннан бері Газада қаза тапқан кемінде 250 журналист пен медиа қызметкерінің бірі болды. Бұл жағдай соғысты қазіргі тарихтағы журналистер үшін ең қауіпті қақтығыстардың біріне айналдырды.
Палестина БАҚ-тарының хабарлауынша, Барзактың өлімі Израильдің бейбіт нысандар мен инфрақұрылымға жасаған жойқын шабуылдары кезінде Газада журналистердің әлі де нысанаға алынып отырғанын тағы бір рет айқын көрсетті.
